Тывада элээн каш культура объектилерин үндезин септелге соонда ажыглалче киирген

Барыын-Хемчиктиң Аксы-Барлык база Тожунуң Салдам суурларда Культура бажыңнарын база Бии-Хемниң төвү Туран хоорайда Сафьяновтар аттыг музейни капитал чаартылга соонда ажыткан. Культура албан черлерин «Культура» национал төлевилел боттандырылгазы-биле септеп-селээн.

Барыын-Хемчик кожуунда клубтуң оран-савазы барык 55 чыл чедип турар. Ооң эде чаартылгазынче 15 сая ажыг рубль акша үнген. Тудугжулар оран-саваның даштын чаартып, дээвиирин база инженер четкилерин солуп, өрээлдерге агар септелгени кылган. Ол ышкаш программа боттандырылгазы езугаар чырык, үн өйлээр чаа аппаратураны болгаш эт-септерни салган.

Барыын-хемчикчилер клувунуң ажыдыышкынында театржыткан көргүзүггү белеткеп алган. Кожууннуң бот-тывынгыр коллективтериниң база Кызылдың уран чүүл колледжизиниң сургуулдарының киржилгези-биле концерт программазын көргүскен.

Оон аңгыда Тожуда Салдам суурда көдээ Культура бажыңын база дужааган. Тываның Культура яамызының медээзи-биле алырга, 1955 чылда ажыглалче кирген клубка чаңгыс-даа капитал септелге кылбаан. Чаа септеттинген клубтуң ажыдыышкынга Тываның Культура яамызындан делегация база суурнуң хоочуннары болгаш чурттакчылары киришкен.

Тываның Алдан-Маадыр аттыг Национал музейниң Туран хоорайда салбыры болур культура объектизин база ажыглалче киирген. XX чүс чылдың эгезинде туткан бажыңның таваан быжыглаары – музейниң төлевилелинде чугула черни ээлээн. Тудугжулар чырыдар, видеохайгаарал болгаш өрт медээлээр системаларны салып, орус чадыр хевирлиг тускайлаң аян-шинчизин арттырбышаан, оран-саваның иштики шимелдезин болгаш даштын чаартып кылган.