Тывада грипп халдавырынга удур тарылга ажылын күштелдирер

Росхереглелхайгааралдың Тыва Республика талазы-биле эргелелиниң дыңнатканы-биле алырга, республикада респираторлуг вирустуг халдавыр аарыглары неделя санында 10-20 хуу көвүдеп турар. Ынчалза-даа амгы үеде аарыгның деңнели эгеки көргүзүгден эвээш болуп арткан.

Тываның Баштыңы [id360104045|Владислав Ховалыг] респираторлуг вирустуг халдавырдан азы грипптен аарыыр чоруктар санының көвүдээрин болдурбазы-биле профилактиктиг хемчеглерни күштелдирерин айыткан.

ОРВИ болгаш грипптен камгаланырының эң-не чедимчелиг аргаларының бирээзи – тарыдып алыры болур. Амгы үеде республикада тарылга кампаниязы дооступ, планнаанының 90 хуузу, азы 185822 кижи тарыткан. Республиканың ниити чурттакчы чонунуң 61 хуузун азы 205848 кижини тарыыры – сезоннуг гриппке удур тарыышкынның ниити сорулгазы.

Владислав Ховалыг эпидемиологтуг хайгаарал түңнелдери-биле танышкаш, планын чедир күүсетпээн кожууннар болгаш эмнелге албан черлери – Кызыл, Чеди-Хөл, Эрзин кожууннарга база республиканың консультация-диагностика төвүнге тарылганың темпизин шапкынчыдарын даалагны берген. Ол ышкаш бо айның төнчүзүнге чедир тарылга кампаниязын доозары чугула деп айыткан.

Сезоннуг аарыгларны болдурбас дээш, эпидемия өөскүвээнде-ле тарылганы баш бурунгаар эгелээри чугула. Тараан соонда ийи-үш неделя дургузунда иммунитет тургустунар. Ынчангаш эмчилер тарылганы соңгаарлатпайн, вакцинаны салдырып алыр кылдыр чонну кыйгырып турар.