Тывада хереглел барааннарының өртээ өскен

2022 чылдың баштайгы дөрт айында Тывада барааннар база ачы-дуза өртектери Россияда ортумак деңнелден оожум өзүп турар. Чыл эгезинде чуртта инфляцияның деңнели 11,7 хуу болган болза, Тывада ол апрельде 9,9 хуу болган.

ТР-ниң Экономиктиг хөгжүлде болгаш үлетпүр яамызы хереглел барааннарынга өртектерниң өскенинге сайгарылганы кылгаш, республика чазаанче киирген.

Сайгарылгадан алгаш көөрге, аъш-чем барааннарының өртээ 13,3 хуу өскен (Россияда – 113,1). Өзүлде колдуунда кат-чимис болгаш ногааларда болган. Капустаның өртээ ийи катап, банан – 37,1, груша – 42,7, борбак согуна – 52,6, виноград – 43,5, картофель – 30,7 хуу өскен.

Чигир өртээ 46,3 хуу, кондитер кылыглары, макарон база крупа өртээ 20 ажыг хууга, сүт база сүт продукциязы – 12, эът аймаа – 8,1 хуу өскен. Эът продуктуларындан сөөк чок, мөөң инек эъдиниң өртээ 22,4 хууга аартаан. Хлеб база хлеб-булочка кылыгларының өртээ 6,7 хуу өскен.
Аъш-чем бөлүүнде чүгле чаңгыс чуурга өртээ баткан, чыл эгезинге көөрде 9,8 хууга.

Тывада аъш-чемге хамаарышпас барааннарның өртээ дөрт ай иштинде 7,1 хууга өскен (Россияда – 13,5). Ювелирлиг кылыглар өртээ 1,5 катап аартаан. Россияга бүдүрген автомашиналар база дугуйлар өртээ 30 хуу, чунар болгаш чугдунар чүүлдер өртээ 21,9 хуу, парфюмерия база косметика – 13,1, электри барааннар база бажың херекселдери – 12,1, эт-сеп аймаа 9,6 хуу өскен.

Ачы-дуза адырында Тывада өртектер Россияда ортумак өртектерден дүрген өскен, республикада – 10,1 хууга, чуртта 7,1 хуу. Банкылар боттарының ачы-дузазын чедиргени дээш эң хөй өртекти тургускан, декабрьга деңнээрге 54,1 хуу аартаан. Ам хереглел чээлизин ажыглааны дээш төлевир 58,8 хууга өскен.

Ачы-дуза адырының чамдык угланыышкыннарында өртектер өзүлдези база демдеглеттинген. Чижээ автомашина чуур ачы-дузаның өртээ 13,9 хууга, автотранспорт дугуйларын өйлээр пунктулар – 12,5 хууга, дугуй эптээр очы-дуза 9,2 хууга өртээн өртүрген.