Тывада иштики херектер органнарының ажылдакчыларынга албан чериниң бажыңын тудар

Республиканың найысылалында иштики херектер органнарының ажылдакчыларынга болгаш хоочуннарынга хөй аалдыг албан чериниң бажыңын тудуп эгелээр.

Төлевилелдиң дөзевилелинге болгаш тудугнуң бодунга акша-хөреңгини РФ-тиң Иштики херектер яамызы регионче чорудар – Тываның Баштыңы Владислав Ховалыгның даалгазы-биле бо айтырыгга дугуржулганы чоокта чаа Москвага Тываның Чазак Даргазының оралакчызының хүлээлгезин күүседип турар Айдыс Сынаа биле РФ-тиң иштики херектер сайыдының оралакчызы Виталий Шулик ужуражылга үезинде чедип алдынган.

Бөгүн Тывада иштики херектер органнарының үш чүс хире ажылдакчылары бажың алыр боттарының ээлчээн манап турар. Чаа бажыңның төлевилел-дөзевилел документилерин келир чылын тургузуп эгелээр, чоокку ийи-үш чылда ону тудуп эгелээри планнаттынган.

Оон аңгыда, регионалдыг Иштики херектер яамызының үндүр бижээн транспорт аймаан фронтуже республиканың дамчыдып бээринге федералдыг албан чери чөпшээрешкен.

Айдыс Сынааның дыңнатканы-биле алырга, удавас элээн каш эргижирээн албан чериниң машиналарында эки байдалдыг техниканы хынап септээш, тускай шериг операциязының девискээринче чорударынга белеткээр. Автоколонна Тывадан Донбассче доктаамал чорудуп турар ачы-дуза чүъгү-биле кады декабрьда чеде бээр.