Тывада күштүг хат-шуурганның уржуктарын чайладыр ажылдар уламчылап турар

Сөөлгү хонукта Тывага агаар-бойдус баксырап, күштүг хат хадаанындан, республиканың элээн каш кожууннарында чырык шугумнары когараан. Электри четкизинге чүък улгатса-даа, аварийлиг өжүрүлде кылбаан.

«Росчетки Сибирь Тываэнерго» акционерлиг ниитилелдиң тускай мергежилдиглери агаар-бойдустуң баксыраарын баш бурунгаар дыңнадып, кезээде белен турар чурумче шилчиткен турган. Ынчангаш дүрген дуза чедирер бөлүктер баштайгы өжүрүлгелер соонда, дораан-на катап тургузуушкун ажылдарынче кирген.

Чырык шугумнарының камгалал автоматиказын шын ажылдатканындан улуг үрелиишкиннер болбаан. Күштүг хат-шуурган үезинде сыйлып дүшкен будуктардан шугумнар каттыжып, кыска замыкание болганда, автоматика четкиде үрелген участоктарны ол-ла дораан өжүрген.

Ол чүүл өрттерни чайладып, дериг-херекселдер үрелиишкинин болдурбайн, трансформатор дузалал станцияларының долу ажылдаарын хандырып, ол ышкаш үзүлген электри удазыннарын дүрген катап тургузар арганы берген.

Агаар-бойдустуң уржуундан беш кожууннуң суурлары чырык чок арткан. Бии-Хем биле Кызыл кожууннарда элээн үеде чырык өшкен. Чөөн-Хемчик, Сүт-Хөл, Чаа-Хөл кожууннарның суурларында бичии када чырык өшкен таварылгалар демдеглеттинген. Чырык шугумнарынга ийи-чаңгыс үерииишкиннер чырыкты өжүреринге чылдагаан болган.

Амгы үеде катап тургузуушкун ажылдары уламчылап турар. Энергетика ажылдакчылары дүн-хүн дивейн үрелген черлерни септеп, планнаттынган хуусаада чырыкты катап бериптерин планнаан.