Кызылда кадыг коммуналдыг бок болбаазырадыр оператор – «ТСП» күрүнениң унитарлыг бүдүрүлгези контейнерлер чанынга кайы хамаанчок чок бок төгерин болдурбазы-биле видеохайгаарал камераларын тургузуп эгелээн. Камералар бокту шын төп турарын хайгаарап, кайы хамаанчок бок төп турар таварылгаларны илередиринге дузалаар.
Вавилин ээтпээнде бир шөлге бирги камераны июльда шенеп салган. Ол бүдүн хүн дургузунда онлайн-чурумда ажылдап турар. Ооң дузазы-биле контейнерлер чанынга кым богун октапканын, кандыг машина-биле чүдүргеш эккелгенин, тудуг азы үнүш боктары бе дээрзин хайгаарап көөр аргалыг апарган.
Регионалдыг операторнуң дыңнатканы-биле алырга, түңнелдер көстүп келген. Камераны тургускан хүнден эгелээш, август 20-ге чедир, ол черде 32 чурум хажыдыышкыны демдеглеттинген. Улус богун кожугга чүдүрүп алгаш келгеш, бункерлер чанынга азы ооң чоогунга арттырып, тудуг болгаш үнүш боктарын төп турар болган.
«ТСП» күрүнениң унитарлыг бүдүрүлгези тырттырттынган шупту болуушкуннарга хамаарыштыр материалды белеткээн. Бүдүрүлгениң юризи билдириишкиннерниң чамдыызын полицияже, а артканын Кызыл мэриязының административтиг комиссиязынче чоруткан.
Оон аңгыда ол тургускан камера шөлдүң бодунда байдалды өскертипкен. Камераны салган соонда, бок эвээжээн, ооң девискээри элээн арыг апарган.
Төлевилелдиң шенелдези үре-түңнелдиг болганы-биле, «ТСП» күрүнениң унитарлыг бүдүрүлгезиниң удуртулгазы видеомониторинг системазын калбартырын планнаан. Бүдүрүлге ам-даа беш камераны садып алгаш, Кызылдың эң-не нарын черлеринге, ооң иштинде бок-сак доктаамал чыглы берген чыдар Вавилин ээтпээ биле солагай талакы дачалар ниитилелинге тургузар деп шиитпирлээн.
Регионалдыг оператор чурттакчы чонга коммуналдыг кадыг бокту төгериниң дүрүмнерин сагыырын база катап сагындырган. Бункерлерже чүгле коммуналдыг кадыг бокту төгер, а эт-сеп база улуг эт-херекселдерни контейнер чанында тускайлаан черге таптыг чыып салыр. Ол ышкаш тудуг болгаш үнүш боктарын бункерлерже чүдүрери, ол ышкаш чүък машиналары болгаш кожуглардан бок дүжүрери база хоруглуг.
«Бир эвес коммуналдыг кадыг бокка хамаарышпас богуңар кожугга чүдүртүнген болза, ону бок полигонунга бодуңар дүжүрүп кааптып болур силер. Ол ышкаш «ТСП» күрүнениң унитарлыг бүдүрүлгезиниң ачы-дузазын база ажыглап болур. Бүдүрүлге-биле бокту үндүр сөөртүр дугайында аңгы керээни чарар. Ол ачы-дуза төлевирлиг» – деп, бүдүрүлге дыңнаткан.