Тыва Республика Стратегтиг эгелээшкиннер агентилелиниң экономиканың кол адырларының профугланыышкынында база кадрлар хандырылгазында бир арга кылдыр үлетпүр туризмин хөгжүдеринче угланган «Ажык үлетпүр» федералдыг программазындан каттыжып кирген.
Тываның Экономиктиг сайзырал болгаш үлетпүр яамызының удуртулгазы-биле үлетпүр туризминиң шөлдери апаар амгы үеде бар бүдүрүлгелерде профугланыышкынныг маршруттарны тургузуп турар. «Туризм болгаш аалчылар хүлээп алыры» национал төлевилел езугаар бо эгелээшкинни боттандырып турар.
ТР-ниң Экономиктиг хөгжүлде болгаш үлетпүр яамызының, Тыва Республиканың хөгжүлде фондузунуң, Тываның гуманитарлыг болгаш социал-экономиктиг тускай шинчилелдер институдунуң экономиктиг шинчилелдер төвүнүң, бүдүрүлге черлериниң, өөредилге организацияларының төлээлери болгаш экскурсоводтар үлетпүр экскурсияларын хевирлээр ажылда киирген. Тываның экономиктиг хөгжүлде сайыдының бирги оралакчызы Чингис Бады ажылчын бөлүктүң ажыл-чорудулгазын удуртур.
Февральда ажылчын бөлүк келир үеде экскурсиялар организастаар элээн каш бүдүрүлгелерни хынап көрген. Чижээ, киржикчилер «Тываның даг-руда компаниязы» бүдүрүлгениң шөлдерин кезип, дериг-херекселдерниң ажылдаарын көрүп, ажылдакчылар-биле ужурашкан. «Восток» КХН-ниң бүдүрүлгелеринде чиг эттен эгелээш белен материалдың үнеринге чедир технологтуг ажылдарны база продукцияның шынарын хынаар системаны өөренип көргеннер.
Төлевилел тургузукчуларының чугаазы-биле алырга, ындыг үлетпүр турлары школачыларга болгаш студентилерге херек кырында ажылдаар олуттарны көрүп, тускай мергежилдиглер-биле харылзажып, регионда хереглелдиг мергежилдер дугайында билип алыр арганы бээр. Программа школаларның 9-11 классчыларынга мергежил шилип алырынга сүмени кадар.
«Мындыг хемчеглер кадрлар айтырыгларын шиитпирлээринге онза чугула. Бүдүрүлгелерге бөгүнде тускай мергежилдиглер дыка хереглеттинип турар, чүге дизе доозукчуларның хөй кезии өске регионнарже ажылдап чоруп турар. Профугланыышкынныг экскурсиялар аныяктарга Тывада профессионал өзүлдениң аргаларын көрүп, төрээн региону-биле боттарының карьеразын холбаарынга дузалаар ужурлуг» – деп, Чингис Бады демдеглээн.
Бүдүрүлгелер программага киришкеш, хевирин болгаш экспорт курлавырларын бедидип, бүдүрген продукциязынга бүзүрелдиг хереглелди тургузуп, иштежилер-биле арга-дуржулгазын үлежир арганы алыр.
Регионнарның программага киржилгези оларның инвестиция сонуургалын бедидер, регион ылгавыр демдээн хевирлээр аргаларны бээр, ол ышкаш Россияның Үлетпүр болгаш садыг яамызының үлетпүр адырында күүсекчи эрге-чагырганың тус чер органнарының үре-түңнелдиг ажылының рейтингизинче кирер.
Туризм адырында чаа угланыышкыннарлыг программага киржилге ажыл-агыйжы, иштики болгаш үнүүшкүннүг туризмни база турүлетпүрнү хөгжүдеринге ажыктыг.
