Апрельдиң 13-тен 26-га чедир Тывада Национал төлевилелдер неделязы эртип турар. Ол үениң дургузунда Президент Владимир Путинниң эгелээшкини-биле ажылдап кылган национал төлевилелдерниң республиканың социал-экономиктиг хөгжүлдезинге болгаш чурттакчы бүрүзүнүң амыдыралынга кандыг салдар чедиргенин көргүзери-биле аңгы-аңгы хемчеглер эртер.
Бо неделяда регионнуң чазаанга болуп эртер Тываның Баштыңының чанында Стратегтиг хөгжүлде болгаш национал төлевилелдер талазы-биле чөвүлелдиң хуралынга Президентиниң эгелээшкиннериниң 2025 чылга чедир күүселдезиниң түңнелдерин үндүрер.
Нацтөлевилелдер неделязының бир кезээ кылдыр өөредилге, культура, спорт, кадык камгалал болгаш социал албан черлери национал төлевилелдерниң кижилерниң амыдыралынга ниити салдарын көргүзер дээш, ажык эжиктер хүннерин, экскурсияларны, ужуражылгаларны, «төгерик ширээлерни», консультацияларны, беседаларны болгаш мастер-класстарны эрттирер.
Национал төлевилелдер – Президент Владимир Путинниң бадылааны 2030 чылга чедир Россияның социал-экономиктиг хөгжүлдезиниң национал сорулгаларын чедип алырының кол арга-хевирлериниң бирээзи. Чурттуң экономиказын быжыглаарынче, технологтуг бот-догуннаашкынын хандырарынче, хамааты бүрүзүнүң амыдыралының шынарын бедидеринче угланган кол шиитпирлер ында кирген.
Тыва Республиканың социал-экономиктиг хөгжүлдезинге күштүг идигни национал төлевилелдерниң күүселдези берген. 2019 чылдан тура оларны боттандырып эгелээш ниитилел ужур-уткалыг түңнелдерни чедип ап, республиканың чурттакчыларының амыдырал-чуртталга байдалын элээн экижиткен.
Регион 2025 чылдан бээр 11 национал төлевилелге киржип турар, ооң иштинде 39 регион төлевилелдери кирип турар.
Президентиниң эгелээшкини-биле 2025 чылда республика:
- 12 эмнелге объектилерин туткан, ооң иштинде 10 фельдшер-акушер пунктузун болгаш 2 амбулаторияны;
- социал ужур-уткалыг 16 объектини, ооң иштинде 7 школаны, 5 кадык камгалал албан черин; 2 профессионал өөредилге бажыңын, 1 уруглар садын база 1 көдээ ном саңын септеп-селээн;
- республиканың 15 автооруун эде чаартып, септээн.
- 30 хөй-ниити шөлдерин чаагайжыткан, а суурлар болгаш хоорайларда чаагайжыдылгалар талазы-биле мөөрейге беш тиилекчи төлевилелди боттандырган.
2026 чылда үш объектиде – Туранда 825 олуттуг школада, Кызылда 280 олуттуг уруглар садында, Дерзиг-Аксында 180 олуттуг бажың-интернатта тудуг ажылдары уламчылавышаан. Ийи культура албан черинде улуг септелгелер чоруп турар, а Шагаан-Арыгда котельнаяны тудуп эгелээн.
Ол ышкаш Кызыл-Арыг суурда фельдшер-акушер пунктузунуң тудуу, 18 социал объектиде (5 эмнелге, 2 уруглар сады, 1 школа, 2 профессионал өөредилге чериниң оран-савазы, 4 культура албан чери, 4 аныяктар төвү) үндезин септелгелер, ол ышкаш 4 оруктуң эде чаартылгазы, 31 хөй-ниити шөлүнүң чаагайжыдылгазы, таарымчалыг хоорай хүрээлеңин тургузар мөөрейге тиилээн эң эки 2 төлевилелди боттандырары планнаттынган.
Төлевилел ажыл-чорудулгазын түңнээринден аңгыда, Тываның Баштыңының чанында Чөвүлел регионда боттандырган национал төлевилелдерниң тускай сорулгаларын үре-түңнелдерин чедип алырының 2026 чылдың сорулгаларын база көөр.