Республиканың оруктарынга хөй хар чаап, ооң иштинде өл хар дүжүп, чамдык кожууннарда сооп келгени-биле орук албан черлери хүн бүрүде дежурныйлаашкынны организастаан.
ТР-ниң Орук-транспорт яамызының дыңнатканы-биле алырга, 200 хире тускай техника хондур-дүндүр ажылдап турар. Оон аңгыда орук организациялары федералдыг болгаш регионалдыг автооруктарда ажылчыннар турлагларында чынныр 12 черни ажыткан.
19 хире орук организациязы 2582 километр регионалдыг автооруктарда хүннүң-не ажылдап турар. Орук ажылчыннары бир дугаарында арттар кырын, көвүрүглерни, кадыр ээр оруктарны, өскээр-бадар черлерни ажаап-карактап турар. Өвүр кожуунда “Тээли” арт кырының участогу хөртүктей хадып турар болгаш, эң берге чер болуп артпышаан.
Тываның чамдык кожууннарында улуг хар чаап, ооң-биле чергелештир эрип база чыдар болгаш, орукчулар орук шимчээшкининиң айыыл чок чоруун хандырар дээш чогуур ажылдарны чорудуп турар. Чыл эгезинден бээр регионнуң оруктарынга тайгакка удур 2900 хире тонна элезин-сайны төккен. Онза байдалдарга таварышкан чолаачылар бирги база техниктиг ачы-дузаларны орукчулар турлагларындан ап болур.
Р-257 федералдыг трассаның дараазында участоктарында чорукчулар чынныр черлер ажылдап турар:
- Кара-Суг суур (555+000 км)
- Буйба арт кыры («Полка») (614+000 км);
- Арадан суур (654+000 км);
- Туран хоорай (729+950 км);
- Кызыл хоорай (803+000 км);
- Шагаан-Арыг хоорай (913+000 км);
- Чадаана хоорай (1026+700 км);
- «Хандагайты» арт кыры (1078 км).
Регионалдыг оруктарда чынныр үш пункт бар:
- «Абакан – Ак-Довурак» автооруунуң 316-гы километринде «Чүс дугаар» арт кыры. «Абазаның ОТСУ» КХН, участоктуң начальниги Е.Г. Семенов, тел: 8-983-376-5055;
- «Хандагайты – Ак-Чыраа» автооруунуң 58-ки км-де «Тээли» арт кыры. «Өвүрнүң ОТСУ» КХН-ниң хайгааралында, участоктуң начальниги М.В. Сат, тел: 8-983-593-3198;
- «Бояровка – Тоора-Хем» автооруктуң 104-кү км-де «Мюн» арт кыры, "Ресурс" КХН-ниң “Мега” КХН тудуг-септелге организациязы;
- «Бүрен-Аксы – Элегес-Аксы – Кунгуртуг» кышкы автоорукта “Урал” автомашинада чынныр пунктуну ажылдаткан, хуу сайгарлыкчы В.Л. Юрков харыылап турар.
Республиканың орук-транспорт яамызы арга-дуржулга чок чолаачыларны узун оруктарже үнерин шеглеп, аргажок чоруур апарза, автомобилиниң техниктиг байдалын ыяк хынап, орук шимчээшкининиң дүрүмнерин хажыт чок сагыырын сүмелээн.
Федералдыг болгаш регионалдыг оруктарда онза байдалдарны диспетчер албанының дараазынче телефоннарынче дыңнадыр:
- регионалдыг оруктарда («Тываавтоорук» ККА) – 8(394-22) 21108, 8-929-358-0911,
- федералдыг оруктарда («Енисей орук эргелели» ФКА) – 8 (391) 265-01-12, +79632521160.
Чаңгыс аай камгалал албаны – “112” деп кыска дугаарже долгаар.
