Тываның Баштыңы Владислав Ховалыг республиканың чурттакчыларынга оруктарга айыыл чок чорук дүрүмнерин сагыырын сагындырып, орук организациялары федералдыг болгаш регионалдыг автооруктарда чынныр 12 черни ажылдатканын дыңнаткан. Ында онза байдалдарга таварышкан чолаачыларга бирги дузаны база үрелген автомашиналарга техниктиг деткимчени көргүзүп турар.
«Соок үеде амы-тынга болгаш кадыкшылга айыылды болдурбазы-биле айыыл чок чоруктуң ниити камгалалын тургусканы ол» – деп, Владислав Ховалыг бодунуң телеграм каналынга дыңнадып, узун орук үнерде машиназын ыяк хынап, дүрген шаппазын, оваарымчалыг чоруурунче республиканың чурттакчыларын кыйгырган.
ТР-ниң Орук-транспорт яамызы оруктарны ажаап-карактап турар орук септелге организацияларының тускай объектилеринде орук чораан улуска чынныр пунктуларны ажылдаткан.
Р-257 федералдыг орукта дараазында черлерде чынныр черлерни организастаан:
- Черная речка суурда (555+000 км)
- Буйба арт кырында – «Полка» (614+000 км);
- Арадан суурда (654+000 км);
- Туран хоорайда (729+950 км);
- Кызыл хоорайда (803+000 км);
- Шагаан-Арыг хоорайда (913+000 км);
- Чадаана хоорайда (1026+700 км);
- «Хандагайты» арт кырында(1078 км).
Транспорт яамызы база дыңнатканы-биле алырга, эмин эртир соой бээр болза, Р-257 федералдыг автооруктуң участоктарынга үш шак болгаш-ла немелде хыналданы чорудар.
Патруль машиналарын ГЛОНАСС азы ГЛОНАСС/GSP спутниктиг навигация системалары-биле чепсеглээн болгаш чаңгыс аай автоматчыткан навигация диспетчер башкарылга системазында кошкан, рациялар болгаш видеорегистраторлар-биле дериттинген.
Патруль машиналарын чылыг, дүктүг чоорганнар, кидис идиктер, бирги эмчи дузазының аптечказы, изиг шайлыг термос, орукка онза байдалдарда дузалаар тускай херекселдер: быжыг хендир, хүүрек, фонарь, немелде одаар чүүл-биле четчелээн.
Регионалдыг оруктарынга үш чынныр черлер ажылдап турар:
- участок начальниги Е.Г. Семеновтуң удуртканы «Абаза ОТСУ» КХН организациязының хандырылгазында «Абакан – Ак-Довурак» автооруунуң 316-гы км-де “Чүс дугаар” арт кырында, тел: 8-983-376-5055;
- участок начальниги М.В. Саттың удуртканы «Өвүрнүң ОТСУ» КХН организациязының хандырылгазында «Хандагайты – Ак-Чыраа» автооруунуң 58-ки километринде «Тээли» арт кырында, тел: 8-983-593-3198;
- В.Л. Юрковтуң хуу бүдүрүлгениң хандырылгазында «Копту-Аксы – Тоора-Хем» автооруунуң 102-ги километринде «Мюн» арт кырында, тел: 8-929-315-5688.
- В.Л. Юрковтуң хуу бүдүрүлгениң хандырылгазында «Бүрен-Аксы – Элегес-Аксы – Кунгуртуг» автодоктаамынга Урал автомашинага чынныр пунктуну ажыдары планнаттынган, тел: 8-929-315-5688.
Федералдыг болгаш регионалдыг оруктарга онза байдалдар тургустунза, дараазында диспетчер албаннарының телефоннарынче долгап болурун ТР-ниң Орук-транспорт яамызы сагындырган:
- регионалдыг оруктар («Тываавтодор» ККА) — 8(394-22) 21108, 8-929-358-0911,
- федералдыг оруктар («Упрдор Енисей» ФКА) — 8 (391) 265-01-12, +79632521160.
Камгалал албанының чаңгыс дугаары — 112 деп кыска дугаарже долгаар.
