Июнь 23-түң байдалы-биле алырга, Тыва Республикада ниитизи-биле 73 гектар черде чеди арга-арыг өрттери өөскээни бүрүткеттинген. Чаңныктан үнген өрттүң кол дөстери Тожу болгаш Сүт-Хөл кожууннарда. Тожу кожуунда Ырбан суурдан 69 километр ыракта 50 гектар черде эң улуг өрт бүрүткеттинген, ында 24 кижи машина-техника чокка өрттү өжүрген. Сүт-Хөл кожуунда Ишкин суурдан 12 километр ыракта 19 гектар шөлдү алган ийиги улуг өрттү өжүреринге 23 кижи база дөрт техниканы ажыглаан.
База ол ышкаш Тожу кожуунда Адыр-Кежиг суурдан 44 километр черде беш гектар шөлдүг өрт бүрүткеттинген, ону өжүреринге дөрт кижи киришкен. Каа-Хем кожуунда үш өрттү чок кылган. Дыштаныр хүннерде Бай-Тайга кожууннуң Бай-Тал суурдан 10 километр ыракта бир гектар шөлде өрттү өжүреринге 11 кижини болгаш ийи техниканы хаара туткан.
Регионалдыг диспетчер албан чериниң дыңнатканы-биле алырга, 2025 чылдың эгезинден бээр Тывага болган 65 арга-арыг өрттериниң 33-үнде, азы чартыы кижиниң буруузу-биле үнгенин баш бурунгаар айыткан. Чаъс-чаңныктан 21 арга-арыг өрттери үнген. Өске бөлүкке хамааржыр 9 өрт арга-арыг фондузунче тараан, ооң санында бир өрт Моолдан Тываже шилчип келген.
Июль 7-ге чедир республикада он арга-арыг ажыл-агыйының шупту он участоктар девискээринде өртке удур онза чурум чарлаттынганын сагындыраал. Онза чурум үезинде хамаатылар арга-арыг черлеринден тускай чөпшээрел чокка арга-арыгже кирери, арга-арыгга болгаш аңаа чоок чыдар черлерге, ооң иштинде чурттакчылыг суурлар девискээрлерге оът-сиген болгаш бокту өрттедири хоруглуг.
Өртке удур онза чурумну чарлаандан бээр, күрүнениң арга-арыг инспекторларының 1594 үнүүшкүнче үнгениниң түңнелинде, өртке удур онза чурумну үрээн кижилерге 20 административтиг протоколду долдурган, оларга РФ-тиң Административтиг чурум үүлгедиишкиннериниң дугайында хоойлунуң 8.32 чүүлү езугаар улуг торгаалдар онаажыр. Полицияже база Тываның Онза байдалдар яамызының хайгаарал албанынче арга-арыг өрттеринге буруулуг кижилерни тодарадырының дугайында 54 билдириишкин кирген.
Арга-арыг ажыл-агый организацияларының өрттер-биле демисежир күштерин болгаш дериг-херекселдерин бедик белеткелче киирген. Кожууннар болгаш сумулар чагыргалары арга-арыгга чадаг болгаш аъттыг хайгааралды организастаарын, амыдырал-хандырылга объектилерниң камгалалын күштелдирерин, өрттер дугайында медээлерни дүрген дамчыдарын сүмелээн. Тываның арга-арыг яамызы республиканың арга-арыг фондузунуң девискээрлеринде өртке удур айыыл чок чорукту хандырар ажылды дүүштүрүп турар.
