Тывада сарыг шажынның ыдыктыг черлериниң даңзызын тургузар

Бүгү-делегейниң IV сарыг шажын шуулганын белеткээр болгаш ону эрттирер талазы-биле республиканың оргкомитединиң даалгазы езугаар, республиканың кожуун чагыргалары боттарының девискээрлеринде сарыг шажынның ыдыктыг черлериниң болгаш тураскаалдарының даңзызын тургузуп эгелээн. Ол ышкаш шажын-чүдүлге объектилеринге санитарлыг арыглаашкын болгаш чаагайжыдылга ажылдары база чоруттунар

Ооң-биле чергелештир Тываның гуманитарлыг болгаш тускай социал-экономиктиг шинчилелдер институдунче шажын-чүдүлге объектилерниң даштыкы байдалынга болгаш чаагайжыттынганынга мониторинг чорудар тускай комиссияны тургузуп, ооң хыналдазын хандырып, ажылды системажыдар дугайында саналды киирген. Ооң составынче ТГШИ-ниң эртемденнери, Кызыл хоорай мэриязының төлээлери, Тываның культурлуг өнчү-салгал объектилерин камгалаар эргелелдиң, Тываның ажыл-чорудулганың чамдык хевирлеринге лицензия болгаш хайгаарал албанының, Туризм талазы-биле күрүне комитединиң база Камба-Лама эргелелиниң төлээлерин киирери планнаттынган.

2026 чылдың августа болуп эртер IV делегей чергелиг сарыг шажын шуулганынга республика белеткенип турарын сагындыраал. Тываның Баштыңы [id360104045|Владислав Ховалыг], аңгы-аңгы чурттарның буддийжи ниитилелдерниң аразында харылзааларны быжыглап, арга-дуржулгазын солчуп, амгы үениң айтырыгларын сайгарып чугаалажыр онзагай шөл апаар шуулганны төлептиг организастап эрттирер дээш, бүгү-ле күжениишкиннерни салырын демдеглээн.