Тывада сес көдээ почта салбырларын эде чаартырын доозуп турар

Россияның Президентизиниң даалгазы езугаар чаартылга программазы-биле бо чылын республикада почта харылзаазының сес салбырынга үндезин септелгени кылган.

Сес объектиниң амгы үеде бир салбыры ажыттынган, үш объект 100 хуу белен (ажыдып болур), дөрт объектиде септелге ажылдары 95 хуу кылдынып, доостурунуң чадазында.

Тээли, Мугур-Аксы, Барлык, Шекпээр, Хандагайты, Чаа-Хөл, Балгазын база Эрзин суурларда почта харылзаазының салбырларынга үндезин септелгени кылыры-биле Тываже 50 хире сая рубльди шилчиткен.

Өвүр кожууннуң төп почта салбыры долузу-биле эде чаартынган. Удавас оран-саваны ажыглалче киирер.

«Россияның почтазы» республика девискээринде социал ужур-дузалыг ажылды чорудуп турар. Республиканың 17 муң ажыг чурттакчыларынга пенсияны почтачылар чедирер. Оон аңгыда, мобильдиг терминалдар дамчыштыр коммунал ачы-дуза төлевилерин база үндүрүглер чыылдазын хүлээп ап турар.