Республикада өскүс уругларның тускай чуртталга фондузунуң чурттаар оран-савазын хынаар албан черлер аразының ончалал комиссиязын тургускан. Тываның Баштыңы Владислав Ховалыг ол дугайында айтыышкынга атты салган.
Күрүнеден социал хөлезилелге чурттаар оран-сава алган өскүс кижи бүрүзүнге чедип, хоойлу езугаар оларның ээлериниң эрге-ажыы хажыттынмаанын, бажыңын ажыглаарынга кым-даа шаптыктавайн турарын хынап, ооң ээлериниң амыдырал-чуртталга байдалы экижип келгенин хынаары – комиссияның кол сорулгазы.
Комиссия ончалал ажылын чорудуп тургаш, хөлезиде алган бажыңнарының документилеринге, коммунал ачы-дуза дээш төлевирлер болгаш оран-саваларны ажыглалының талазы-биле тургустунган айтырыгларны чурумчудар. Ылаңгыя чурттакчылар-биле социал хөлезилел керээни тургусканының шынныын, ээлериниң чуртталга дүрүмнерин сагып турарын хынап, өскүс уруглар-биле чурттап турар кижилерниң даңзызын тодарадыр. Бажыңны хөлезилеп турар харыысалгалыг кижилер 5 чыл чурттаан соонда, социал чуртталга бажыңын хуужудуп алыр эргези барын тайылбырлаар.
Ажаалда-тежээлде болгаш харагалзал ажыл-чорудулгазын хайгаарап турар комиссияны Тываның өөредилге сайыдының оралакчызы удуртурун томуйлаан. Комиссияның составында ТР-ниң Өөредилге яамызының төлээлеринден аңгыда, Тудуг, Чер болгаш өнчү яамыларындан, тус чер чагырга органнарындан тускай мергежилдиглер кирип турар.