Тывада социал бүдүрүлгелер национал төлевилел-биле деткимчени алган

Республиканың социал сайгарлыкчылары Чурттуң Президентизи Владимир Путинниң саналы-биле эгелээн “Биче болгаш ортумак сайгарлыкчы чорук болгаш хууда сайгарлыкчы чорукту деткиири” национал төлевилелдиң чорудуу-биле грантыларны алган.

ТР-ниң Экономиктиг хөгжүлде болгаш үлетпүр яамызы Кызылдың өөредилге-бүдүрүлге бүдүрүлгези, «Салчак» хөгжүм чогаадылга лабораториязы, «Алдар» спорт клуву, «Күзел школазы» немелде өөредилге чери, «Индиго» өөредилге төвү, «Лыба» уругларга болгаш элээдилерге логопед кабинеди социал сайгарлыкчы чоруктуң чедиишкинниг төлевилелдерниң көскү үлегер-чижээ дээрзин демдеглээн.

1960 чылдарның эгезинде Кызылга чоорганнар даараар, аъш-чем сугар саазын саваларны хырбалаар улуг эвес бүдүрүлге цеги ажылдап эгелээн. 1970 чылда Кызылдың караа көрбестер ниитилелиниң бүдүрүлгези ажыттынган. Аңаа көөрү багай харык шинээ кызыгаарлаттынган кижилер ажылдап эгелээн.

Бүгү-россияның караа көрбестер ниитилелиниң найысылалда бүдүрүлгезиниң ажылдакчылары республиканың чурттакчыларын эки шынарлыг, чүгээр өртектиг пөс-таавы, кудустар, чоорганнар, хол-хаптар, хептер, сыртык, чоорган хаптары дээш өске-даа барааннар-биле хандырар дээш ак сеткилдиг ажылдап турарлар.

Социал сайгарлыкчы чорук – хамаатыларның болгаш ниитилелдиң социал айтырыгларын шиитпирлежиринге дузалажып, ниитилелге ажыктыг сорулгаларны чедип алырынче угланган бизнес болур.