Тываның Чазаа күскү-кышкы үеде суг объектилеринге озал-ондактарны болдурбазы-биле, 2025 чылдың ноябрь 15-тен 2026 чылдың апрель 1-ге чедир республика девискээринге «Чуга дош» деп профилактика акциязын чарлаан айтыышкынны хүлээп алган.
Тываның Баштыңы Владислав Ховалыг оперативтиг албан черлери, яамылар, ол ышкаш муниципалдыг тургузуглар удуртукчуларының мурнунга суг объектилеринге хамаатыларның айыыл чок чоруун хандырар элээн каш даалгаларны берген.
Владислав Ховалыг Тыва Чазактың кежигүннери-биле аппарат хуралында профилактиктиг хемчеглерниң эгелээнин дыңнадып тура, хамаатыларның айыыл чок чоруу күрүне органнарының база албаннарының мурнады көөр ниити айтырыы-дыр деп айыткан.
Тываның Баштыңы хемнер-сугларга хамаатыларның айыыл чок чоруун онза хайгааралга ап, салдынган даалгаларны хажыт чок сагыырын хандырар даалганы шупту харыысалгалыг кижилерге берген.
«Муниципалитеттер болгаш чогуур яамылар удуртукчуларынга тодаргай даалгаларны бердим: чон ортузунга тайылбыр ажылын организастаар, сагындырыглыг демдектерни тургузар, кышкы үеде балыктаар база доштап чоруур черлерни онза контрольга алыр. Чамдык кожууннарда кышкы кежиглерниң айыыл чок чоруун хандырары – онза кичээнгейде турар ужурлуг» – деп, Владислав Ховалыг социал четкилерде бодунуң арнында дыңнаткан.
Чайгы үеде паром-биле аргыштырар, кыжын дош кежиглерлиг Каа-Хем биле Улуг-Хем кожууннарның чагыргалары ол ажылдарже онза кичээнгейни салыр. Кышкы үеде автотранспорт аймаа биле чадаг кижилер чоруурунга белен кылдыр дош кежиглерни белеткээрин ноябрьның 15-ке чедир доозар. Ол үеге чедир чөпшээрел чокка доштап чоруурун соксадып, хемнерниң дожу кылыннай бээрин доктаамал хынаары чугула. Шак ындыг черлерге Орук шимчээшкининиң айыыл чок чоруунуң күрүне инспекциязы-биле кады дежурныйлаашкынны организастаарын кожууннер чагыргаларынга сүмелээн.
Тываның Орук-транспорт яамызынга чедир дош кежиглерни ажыглаарынга беленин декабрь 15-ке чедир хандырар даалганы берген.
Владислав Ховалыг назы четпээннер ортузунга профилактика ажылынче онза кичээнгейни углаарын база айыткан. Россияның Онза байдалдар яамызының Тывада кол эргелелиниң биче хемелер талазы-биле күрүне инспекциязының инспекторлары-биле кады дош кырынга айыыл чок чорук дүрүмнериниң дугайында өөреникчилерге профилактиктиг чугааларны чорудуп турар. Биче суднолар талазы-биле күрүне инспекциязының инспекторлары 2025 чылдың эгезинден бээр 12 муң ажыг уругну хаара туткан 700 ажыг профилактиктиг кичээлди эрттирген.
ТР-ниң ИХЯ база ОБЯ ажылдакчыларының күжү-биле тус чер чагыргалары эриктерге, кышкы балыктаар черлерге, дош кежиглерге хайгааралды организастаар.
Владислав Ховалыг республиканың чурттакчыларынга чуга доштап эртип бар чорааш, амы-тынны болгаш кадыкшылды бодап, кончуг серемчилелдиг болурунче кыйгырган. «Ылаңгыя уругларның айыыл чок чоруунче кичээнгейлиг болуңар» – деп, ол чагаан.
Россияның Онза байдалдар яамызының Тывада кол эргелелиниң дыңнатканы-биле алырга, 2025 чылдың эгезинден бээр республиканың суг объектилеринге 16 таварылга демдеглеттинген, эрткен чылдың ол үезинге деңнээрге 40,7 хуу эвээш. Он дөрт кижи чок болган, эрткен чылга деңнээрге ийи катап хөй – алды кижини камгалап алган, ийи кижи ис чок читкен.
