Тываның Баштыңы Владислав Ховалыг Россияның тудуг, чуртталга-коммунал ажыл-агый сайыды Ирек Файзуллин-биле Тываның девискээринде одалга сезонунуң эртип турарын болгаш өске-даа айтырыгларны чугаалажып көрген. Федералдыг яамының удуртукчузу-биле ажылчын ужуражылганың түңнелдерин Владислав Ховалыг бодунуң телеграм каналынга үлешкен.
Регион баштыңының дыңнадыындан алырга, сайыт-биле республиканың коммунал инфратургузуунуң чаартылгазы, «Амыдырал инфратургузуу» национал төлевилелдиң кол сорулгаларын болгаш амгы үеде ажыл-чорудуун, ол ышкаш чаа хандырылга инфратургузуун тударының аргаларын чугаалашканнар. Республиканың найысылалы Кызылга «Эне-Сай» дузалал станциязын база найысылал чоок-кавызының электри энергиязының күчү-күжүн улгаттырарынга бедик күштүг чырык дамчыдар агаар шугумнарын тударынга хамаарыштыр чугааны кылганнар.
110 кВ күчүлүг «Эне-Сай» дузалал станциязын тудары Тывага чырык хандырылгазының комплекстиг планының кол кезээ болгаш, РФ-тиң Чазак Даргазының бирги оралакчызы Денис Мантуровтуң 2024 чылдың октябрьда ажылчын ужуражылга үезинде берген даалгаларының бирээзи болурун сагындыраал. Кызылга ол дузалал станция чаа-чаа объектилерни тудар арганы берип, чаа чуртталга комплекстерин шынарлыг чырык-биле хандырар.
Ол-ла ужуражылга үезинде «Коммунал инфратургузугларны чаартыры» федералдыг төлевилел езугаар Шагаан-Арыг хоорайга чаа котельная станциязын тударын база чугаалашкан. Оон аңгыда, Владислав Ховалыг Ирек Файзуллин-биле Тывада чаа чуртталга бажыңнарының тудуунуң чамдык түңнелдери болгаш планнары-биле үлешкен.
Россияның Тудуг яамызы 2030 чылга чедир тудуг үлетпүрүн хөгжүдер мурнады хөгжүдер угланыышкыннарның бирээзи болганда, «Тудугнуң чаа ритми» федералдыг төлевилелде кирген инвестиция-тудуг чорудуун кызырар талазы-биле планнаттынган ажылдарны Тыва чедиишкинниг боттандырып турарын демдеглээн. 2025 чылда республикада хөй аалдыг бажыңнар тудар төлевилелди боттандырарының ортумак хуусаазы 1121 хонуктан 821 хонук чедир кызырылган.
«Тывага федералдыг чазактың көргүзүп турары улуг деткимчези дээш өөрүп четтирдим, ол биске көскү чедиишкиннерни чедип алыр арганы берип турар» – деп, Владислав Ховалыг демдеглээн.
Эрткен чылын Тыва чуртталга тудуунуң адырынга көскү чедиишкиннерни чедип алганын ол сагындырган: 2025 чылдың 11 айында 439 муң дөрбелчин метр чуртталга бажыңнарын ажыглалче киирген, планнаан көргүзүгден 170 хуу хөй. Ниитизи-биле 2021 чылдан 2025 чылга чедир улуг хемчээлдиг инвестиция төлевилелдери-биле республика девискээринде хөй квартиралыг 40 бажыңны база чуртталга шөлүнге хамаарышпас 133 муң дөрбелчин метр шөл тудугну туткан.
«Айыттынган планнарывысты боттандырары-биле федералдыг төп-биле сырый кады ажылдажылгавысты ам-даа уламчылаар бис» – деп, Владислав Ховалыг бодунуң блогунда бижээн.
