Тывада күрүне болгаш муниципалдыг күш-культура болгаш спорт албан черлери тускай шериг операциязының киржикчилеринге болгаш оларның өг-бүле кежигүннеринге халас ачы-дузаны көргүзер. Республиканың чазаа «Тускай шериг операциязының киржикчилеринге немелде социал магадылалдар болгаш оларның өг-бүле кежигүннеринге социал деткимче хемчеглериниң дугайында» регионалдыг хоойлуже чогуур өскерилгелерни белеткеп, Дээди Хуралче бадылаар кылдыр чоруткан.
Тускай шериг операциязының киржикчилери болгаш оларның өг-бүле кежигүннери үстүнде айыткан албан черлеринде көргүскен ачы-дуза өртээниң 50 хуузун төлеп, күш-культура болгаш спорт залдарынче барып турар. «Бүгү чүүлдү тиилелгеже!» республика комиссиязы тренажер залдары болгаш өске-даа спортчу албан черлеринче халас баар шиитпирни үндүрген. Тускай шериг операциязының киржикчилериниң өг-бүле кежигүннеринге база ажы-төлүнге ол чиигелде хамааржыр. Олар Тываның күрүне болгаш муниципалдыг күш-культура болгаш спорт албан черлериниң көргүскени ачы-дузазының шупту хевирлерин халас ажыглап болур.
Тываның эрге-чагыргазы тускай шериг операциязының киржикчилерин болгаш оларның өг-бүлелерин деткиир хемчеглерниң даңзызын, ооң иштинде саң-хөөге хамаарышпас дузаның хевирлерин доктаамал калбартып турар. Ооң-биле чергелештир оларның кадыкшылын быжыглаарынче, балыгланган соонда катап тургустунуп, эмнээшкинни алырынче, социал болгаш профессионал бот-сайгарлыр аргаларны тургузарынче онза кичээнгей салдынган.
