Тывада угарлыг ыштан хораннаныр чорукка удур ажылдарны күштелдирген

Тывада одалга сезонунуң үезинде чуртталга бажыңнарынга өрттер болгаш угарлыг ышка хораннанган болуушкуннар саны өскерилген. Кызыл хоорайга Бай-Хаак кудумчузунда тос каът бажыңга болган өрт – ооң бирээзи. Россияның Онза байдалдар яамызының Тывада Кол эргелелиниң өртчүлери дүрген хөделгениниң ачызында, өрттү дыка дүрген өжүрген, ол үеде камгалакчылар сес дугаар каътта бажыңынга боттары арткан турган ийи бичии уругну айыылдан чайлаткан. Олар хоралыг ышты тынып четтигипкенинден, 10 харлыг кижини «токсиктиг хораннаныышкын» деп диагноз-биле эмнелгеде чыттырган, 11 харлдыг уруг чүгээр болганындан амбулаторлуг эмнээшкинни алган.

Аңгы-аңгы чылдагааннар-биле үнген өрттер республикада бо-ла болуп турар. Чыл эгезинден тура Тывага муң хире бажың өрттери болган, аңаа 12 кижи чок болган, 44 кижи когараан. Колдуунда-ла печкаларны ажыглаарының айыыл чок чорук дүрүмүн хажытканындан өрттер үнүп турар. Чамдык таварылгаларда өрт үнмейн-даа барып болур, а өрээл иштинге кижиге онза хоралыг хоран – чыт чок угарлыг ыш чыглы берип болур. Кадык камгалал яамының медээзинден алырга, эрткен чылын угарлааш тос бичии кижи чок болган, бо чылдың эгезинде – үш. Бо болуушкуннар печка-биле одаар бажыңнарга болганы демдеглеттинген.

Тываның Баштыңы Владислав Ховалыг хуу чуртталга бажыңнарының чурттакчыларынга информация-профилактика ажылын күштелдирерин чагырга даргалары-биле профилактика субъектилеринден негээнин сагындыраал.

Камгалакчылар боттары печкалыг бажыңнар ээлери-биле ужуражып, дүрүм парлаан хуудустарны тарадып, ол угланыышкында ажылды күштелдирген. Айыыл чок чоруктуң кичээлдеринде школачыларга угарлыг ыштың айыылының база хораннанган таварылгада бирги дузаны канчаар көргүзерин тайылбырлап берип турар.

Социал албан черлериниң ажылдакчылары амыдыралдың берге байдалында хөй ажы-төлдүг өг-бүлелерге, шимчей албас хамаатылар бар өг-бүлелерге дузалажыр дээш, ыш азы угарлыг ышты билип каар медээчилерни бажыңнарда салып турар. «Угаанныг» медээчилер айыылды бажың ээлеринге баш бурунгаар дыңнадыптар.

Бо чылын республиканың Күш-ажыл болгаш социал политика яамызы даңзыда өг-бүлелерге салыр дээш 1500 ындыг дериг-херекселди садып алган. Бөгүнге чедир 1355 медээчини салган. Өг-бүлеге болгаш ургаларга социал дуза төптери территориалдыг хайгаарал органнары-биле кады медээчилерни салыр ажылды организастаан. Оларны салганын база канчаар ажылдап турарын специалистер тускай рейд үезинде хынаан.

Тываның Баштыңы Владислав Ховалыгның эгелээшкини-биле ону организастаан, ол-ла үеде программаның чаа киржикчилеринде салдынган медээчилерниң байдалын база көөр.

2018 чылда Тывада эгелээн бо ажыл-биле 2600 автономнуг өрт медээчилерин салган. Ону салдырып алыр күзелдиг улус чурттап турар чериниң социал дуза төвүнден дилеп болур. Маркетплейстерде өрт медээчизин таарымчалыг өртек-биле садып турар.