Тываның Чазаа ийи медицина черин эде тургузуп, төптү эмнелгеге каттыштырар шиитпирни үндүрген. Россияның Кадык камгалал яамызының алды чыл бурунгаар үнген дужаалы езугаар, шупту реабилитация төптеринге реанимация салбырлары, лабораториязы, рентген болгаш функционалдыг диагностика өрээлдери албан турар ужурлуг. Бир эвес ол килдистер бар болза, албан чери ынчан эмнээшкин чорударынга чөпшээрелди алыр.
Реабилитация төвү база ооң шупту ажылдакчылары каттыжылга соонда, ажыл-чорудулгазын боттарының черлеринге, ол-ла черге уламчылаар. Тываның кадык камгалал сайыды Анатолий Югайның чугаалааны-биле, төп уруглар эмнелгезиниң реабилитация салбыры кылдыр эде адаттынар. Ийи албан черин каттыштырганы эмчи дузазының шынарын болгаш хемчээлин эвээжетпес. Харын-даа, чаа албан чериниң арга-шинээн улам калбартыр. Ынчаар мөөңнеп быжыглаашкынны чорутканындан, дыка хөй эмчилер болгаш тускай мергежилдиглер административтиг ажылдан хосталып, боттарын медицинага долузу-биле бараалгадыр.
Каттыштырып турар үеде уругларның катап тургузуушкун медициназы болгаш реабилитация төвүнде шупту 118 ажылчын олут турган, ооң иштинде 45 эмчи. Төптүң ажылдакчыларының хөй кезии албан-дужаалынга ажылдап артар.
Тываның Чазаа ийи албан черин каттыштырып тура, херек апарза, төптүң шупту ажылдакчыларын өске эмнелгелерже ажылдадыр даалганы республиканың Кадык камгалал яамызынга берген.
Төп биле уруглар эмнелгезиниң каттышканы аарыг уругларга ажыктыг апаар дээрзинге яамы бүзүрелдиг. Эксперттерниң бодалы-биле алырга, эде организастаашкын чүгле эмчи дузазының чедингирин, ооң хемчээлин болгаш шынарын бедидер эвес, а эмнээшкинни болгаш реабилитацияны үзүктел чок чорударын хандырар. Бо аарыг кижилерни эмнээринге эң эки түңнелдерни чедип алырының чугула аргазы-дыр.