Тывадан барган дайынчыларның фронтучу ада-иези

Тускай шериг операциязының эгезинден тура Белгород облазының Ровеньки суурдан Иван биле Мария Обрезановтар Тывадан барган шериг оолдарның фронтучу ада-иези апарган. Оларның бажыңы – бистиң оолдарга шериг хөделиишкиннерниң мурнуку одуруунче чоруур мурнунда күш кирип, чаглактаныр чери апарган.

ТР-ниң Дээди Хуралының Даргазы Кан-оол Даваа Иван Обрезанов-биле доктаамал харылзажып турар.

– Иван Алексеевич-биле өйлеп-өйлеп долгажып тура, ооң үнүнден шагзырап турарын чамдыкта эскерип каар мен. Ооң шылап турары чɵп, чүге дизе ол дүне-хүндүс дивейн бистиң дайынчыларывысты уткуп, бодунуң бажыңынга дыштандырып, оларга чем кылып берип, эмнелгелерде балыглаткан дайынчыларга ужуражып, садыглардан херектиг чүүлдер дилеп маңнап, дайынчыларывыстың машина-техниказын септежип база четтигип турар.

Шеригжилеривис дээш ол барык дүн-хүн чок сагыш човап чоруур. Ооң шыдамыын үнелээр, хүндүлээр бис. Иван Обрезановка деткимчези дээш Дээди Хуралдың депутаттарының мурнундан база катап четтиргенимни илередип тур мен! Тиилелге бистии болур!