Тываның Чазаа Улусчу фронтунуң регионалдыг салбыры-биле кады ачы-дуза чыылдазын организастаан. Кожууннар, сайгарлыкчылар, эки турачылар, күш-ажылчы коллективтер аңаа идепкейлиг киришкен. Ээлчеглиг ачы-дуза чүъгүн шериг албан-хүлээлгелиглерниң чагыын езугаар хевирлээн.
«Эрткен неделяда Улусчу фронт-биле кады ээлчеглиг ачы-дуза чүъгүн чоруттувус. Чүък машиналары үш угланыышкынче үнүпкен. Тура дүшпес «УАЗ-буханка», чиик машиналар, мотоциклдер, электрилиг чадаг-тергелерни чүдүрген. Оон аңгыда 35 бензин-биле ажылдаар хирээ, 30 хире генератор, 200 хире камгаланып шыптынар четкилерни дамчыткан бис. «Деткимче» регионалдыг фондтуң шугуму-биле ужудукчу чок аппараттар, видеодозукчулар, харылзаа дериг-херекселдери база мототехниканы аңгы саттывыс» – деп, Тываның Баштыңы Владислав Ховалыг дыңнаткан.
«Деткимче» фондузу Тываның Баштыңының даалгазы езугаар, харылзаа болгаш хайгыылга ажыглаар дериг-херекселдерни: «Мавик 4 Комбо» маркалыг чеди ужудукчу чок аппарат, «Диспетчер» маркалыг беш видеодозукчуну, 10 рация, үш мотоцикл, чеди электрилиг чадаг-тергени аңгы садып алган. Фонд оон аңгыда, чүък машиналарының оруун бензин-биле бүрүн хандырган.
Автоколоннаның маршруду кол девискээрлер: Донецк болгаш Луганск угланыышкыннарын, Запорожье биле Херсон, ол ышкаш Курск база Белгород областар кылдыр тургустунган.
Владислав Ховалыг тускай операцияның киржикчилериниң ачы-дуза чүъгүн хүлээп ап турар көргүскен видеобижидилгени парлаан.
«Хүндүлүг чаңгыс чер чурттугларым! Амгы үеде Курск облазында турар Ленинград шериг округунуң дайынчыларының мурнундан өөрүп четтиргенивисти илередип тур бис. Силерниң биске чоруткан бүгү чүүлдериңер – ужудукчу чок аппараттар, детекторлар, электрилиг чадаг-тергелер, рациялар – бистиң дайынчы даалгаларывысты күүседирин элээн чиигедип турар. А эң-не кол чүүл, бистиң дайынчыларывыстың амы-тынын камгалаарынга дузалыг. Шупту кады күштүг бис, Тиилелге бистии болур!» – деп, видеобижидилгелерниң бирээзинде дайынчылар четтиргенин илереткен.
Тываның Баштыңы бодунуң ээлчээнде дайынчыларны деткээни дээш, республиканың чурттакчыларынга база катап өөрүп четтиргенин илереткеш, бо чүүл фронт биле тылдың демниг чоруун бадыткап турар деп демдеглээн.