Тывадан долу эвес мөөңнээшкин-биле чоруткан шериглер-биле болуушкунга хыналда чоруп турар

Тываның Баштыңы РФ-тиң Президентизиниң Чарлыы езугаар эге белеткелдиң баазалыг деңнелин хандырар оперативтиг штабтың хуралын эрттирген.

Владислав Ховалыг оперштабтың кежигүннеринге тыва шериг албан-хүлээлгелиглерниң чидиг айтырыгларын РФ-тиң камгалал сайыдының оралакчызы генерал-полковник Виктор Горемыкинге дыңнаткан.

Республиканың төлээлери байдалды ол черинге таныжары-биле, Тывадан Донецк Улус Республикаже үнүпкен. «Чамдык чүүлдерни тодарадып аптывыс, ындыг болзажок, төнчү түңнелдер үндүрери элек» – деп, Тываның Баштыңы чугаалаан.

Штаб кежигүннери Тыва Республиканың шериг комиссарының оралакчызы Андрей Басенковтуң тодаргай шериг кезээнге долу эвес мөөңнээшкин-биле кыйгырткан хамаатыларны быжыглаарының, документилерин долдурарының база акша хандырылгазын үе шаанда бээриниң чурумнарын чугаалаан.

Ол ышкаш долу эвес мөөңнээшкинче кыйгырткан хөй ажы-төлдүг адаларны долу эвес мөөңнээшкинден хостаары канчаар чоруп турарын илеткээн. Тываның шериг комиссариды долу эвес мөөңнээшкин дугайында хоойлунуң негелделери езугаар долу эвес мөөңнээшкинге хамааржыр шупту хемчеглерни үе-шаанда чорутканын, Басенков дыңнаткан.

Долу эвес мөөңнээшкинче кыйгырткан хамаатыларны ийи угланыышкынче чарган. Бөлүктүң бирээзи 55-ки мото-адыгжы бригаданың баазазынга тускай белеткелди эрткен болза, а өскези Новосибирскиниң дээди шериг училищезиниң баазазынга шериг белеткелин эртери-биле Новосибирск хоорайже чоруткан. Шериг кезээнче долу эвес мөөңнээшкинче кыйгырткан хамаатыларны дамчыдарда, даңзы езугаар, хүлээп база дамчытканының акт-саавырын тургускан.

«Алушта» тускайлаттынган адыр медээлериниң баазазынче шупту документ-саавырларны база шериг бүрүткелиниң дужаалдары кирген. Шериг албан-хүлээлгелиглерниң дугайында долу медээлер айыттынган программада бар, ол езугаар акша хандыралгазын берип турар.

Тускай шериг операциязының айтырыгларның талазы-биле Тываның Баштыңының тускайлаттынган төлээзи Тимур Куулар Новосибирскиниң дээди шериг училищезиниң начальнигиниң хүлээлгезин күүседип турар подполковник Дмитрий Волоткович-биле телефон дамчыштыр харылзашканын, Тывадан долу эвес мөөңнээшкинче кыйгырткан хууда состав полковник Петровтуң удуртулгазында 8-ки ниити шериг армиязының 1-ги армейжи корпузунуң 1-ги мотоадыгжы бригадазынче акты-биле шилчиттингенин дыңнаткан.

Долу эвес мөөңнээшкинче кыйгыртканнар тускай шериг операциязының девискээринче чоруур мурнунда, тактиктиг, тускай тактиктиг, от, тускай белеткел, харылзаа болгаш инженер белеткели, шериг медицина, топография, химиктиг база биологтуг камгалал талазы-биле белеткелдерни эрткен. Шупту шериглер дайынчы идик-хеп, дериг-херексел, хеп-биле хандырттынган.

Кижи бүрүзү дайынчы ок-чепсек, куяк шыпкан кандаазы, касканы, эрги хевирниң шериг хевин алган. Чогуур хоойлу езугаар хандырылганың өске-даа хемчеглерин берген. Долу эвес мөөңнээшкинче кыйгырткан оолдарны тускай шериг операциязының девискээринде айыттынган шериг кезээнче дамчыткан дугайында акт бар.

Владислав Ховалыг Тыва Республикада шериг комиссариадының удуртулгазындан долу эвес мөөңнээшкинче кыйгырткан оолдарның тодаргай шериг кезээнге быжыглаттынган турарын, оларның документилерин шын долдурарын сайгарып, шиитпирлээрин дилээн.

Тываның Баштыңы Донецк Улус Республиканың Чазааның даргазы Виталий Хоценко-биле шала орайтадыр база катап чугаалашкан.

– Бүгү шериг албан-хүлээлгелиглер боттарының быжыглаттынган девискээринде туруштарында турар деп бисти бүзүреттилер. Армейжи корпустуң командылал чери ол болуушкунну сайгырып турар. Виталий Хоценко Донецк Улус Республиканың Чазаандан ол айтырыг дээш харыысалгалыг төлээни томуйлаан – деп, Владислав Ховалыг бодунуң блогунда дыңнаткан.