Самара хоорайга Баштайгылар шимчээшкининиң эки турачылар следунда Тывадан школачылар киришкенин республиканың немелде өөредилге сайзырадыр төвү дыңнаткан. Оларның аразында ийи өөреникчи Ак-Довурак хоорайдан, артканнары Улуг-Хем кожууннуң төлээлери.
Анастасия Куулар – Ак-Довурак хоорайда «Өлчей» лицейниң 11-ги классчызы. Ол эки турачыларның одуруунче 2025 чылда кирген, ынчалза-даа өскелерге дуза чедирер ажылды 10 класс тургаш-ла эгелээн. «Берге байдалдарга таварышкан улуска дуза кадары – чоргааранчыг базым, оон аңгыда доозукчуларга дээди өөредилге черинче дужаап киреринге немелде баллдар бээр» – деп, Анастасия демдеглээн.
Батыр Салчак ол-ла лицейниң 10-гу клазында өөренип турар. Эки турачыларның одуруунче 2025 чылдың күзүнүнде кирген. Ол хайгаарал чок азырал амытаннарга дузалаар, хоорайны аштап арыглаар ажылдарда идепкейлиг киржип турар. Эки турачы ажылга келгеш, чаа эштерни тыпкан.
Улуг-Хем кожуундан Айыран Кудер-оол, Олча Шактар-оол база Буяна Монгуш эки турачылар следунда киржип турарын сагындыраал. Олар эки турачыларның одуруунда 2023 чылда-ла кирген. Тывадан бөлүктү Баштайгылар шимчээшкининиң регионда салбырының эки турачы чорук талазы-биле төлевилелдер удуртукчузу Буяна Сат үдеп чоруур.
Киржикчилерниң графиги чай чок: лекциялар, мастер-класстар, төлевилелдер сессиязы дээш оон-даа өске солун чүүлдер хөй.