Тывага бүдүрген: “Бай-Хаак Аква”

«Бай-Хаак» бүдүрүлгези мөңгүн холумактыг савалаан сугну 2012 чылда, а 2013 чылда янзы-бүрү кат-чимис амданныг компот, морс, шайлар, база газ холумактыг чигирзиг суксуннарны бүдүрүп эгелээн.

«Бай-Хаак Аква» – бойдустан бүткен дээди категорияның экологтуг арыг ижер суу. Ону Таңды-Ууланың эдээнде Теректиг деп черде чер адаандан 80 метр ханы черден үнүп турар мөңгүн холумактыг сугдан бүдүрүп турар.

– Санкциялар турбуже бис ажылывысты уламчылап, бүдүрүп турар барааннарывыстың хемчээлин бадырбайн, харын-даа улгадып турарын бүзүрелдии-биле чугаалап болур бис. Тываның чурттакчыларын долузу-биле хандырып шыдаар бис – деп, бүдүрүлгениң менеджери Ольга Ощепкова чугаалап турар.

Өске девискээрлерден кээп турар ижер суглардан ооң ылгалы – мөңгүн холумактыг. Бир литр сугда магний, кальций, натрий, калий, хлорид, гидрокарбонат, сульфаттан аңгыда мөңгүн тургузуглуг. Ынчангаш бо суг кижиниң мага-бодунга эм-шынарлыг, таарымчалыг салдарны база чедирер.

Күрүне деткимчезиниң ачызында «Бай-Хаак» КХН ажылдаарын уламчылап, күчүзүн улгаттырган. Бүдүрүлгеде ниитизи-биле бир ээлчегде сес кижи ажылдап турар. Чайгы үеде ажылдакчыларның саны көвүдеп келир.

«Бай-Хаак Аква» кызыгаарлыг харыысалгалыг ниитилелдиң тургузукчуларының бирээзи Шончалай Соян коронавирус хамчыы болгаш санциялар турбуже бүдүрүлгези ажылын соскатпаанын чугаалаан. "Санкцияларның уржуундан сава, этикетка өртээ улгаткан-даа болза, бис бараанывыстың өртектерин биеэги хевээр арттырдывыс" - деп, ол демдеглээн.

Бүдүрүлге күрүне керээлери-биле сырый ажылдап, бүдүрген бараанын уруглар садтарынче, школаларже чедирип турар. Эрткен чылын 450 киловатт трансформаторну садып алгаш, эптеп тургускан. Ол ышкаш 10 тонна суг сөөртүр автомашинаны лизинг-биле саткан.