Тус черниң бараан бүдүрүкчүлерин болгаш хууда сайгарлыкчыларын деткиири-биле Объясняем.РФ порталдың иштинде «Тывага бүдүрген» деп төлевилелди ажылдап кылган.
“Ирбис cake” кондитер кылыглар бүдүрүлгези республиканың рыногунда алды чыл ажылдап турар. Ук бүдүрүлгениң ийи цегинде хүннүң-не амданныг чээрби торту, он беш янзы кондитер кылыгларын быжырып турар. Бүдүрүлге үжен кижини ажылче хаара туткан. Команданың бир кезии кондитер цегинде, артканы кофейняларда ажылдап турар.
“Ирбис cake” кондитер кылыглар бүдүрүлгезиниң удуртукчузу Наталья Умановская ук бизнести “узун шөлээге” тургаш ажыдып алган.
– Узун шөлээ үезинде кижиге хөй хостуг үе тыптып келир. Ол ынчан аваларга боттарының сонуургалдарындан орулганы ажылдап ап болур аргалар ажыттынар. Бистиң командавыста арга-дуржулгалыг 10 ажыг кондитер ажылдап турар. Олар-даа, мен-даа билиивисти доктаамал бедидип, өөренип турар бис – деп, кондитер чугаалар турар.
Наталья Кызылдың экономика болгаш эрге-хоойлу техникумун кызыл диплом-биле дооскан. Профессионал технолог «Тываның тергиин аныяк сайгарлыкчызы-2018» деп атка төлептиг болган. 2020 чылда “Ирбис cake” кондитер кылыглар бүдүрүлгези “Кызылда эң тергиин онлайн-садыглаашкын” мөөрейге тиилээн.
Covid-19 хамчыындан киирген шеглел-кызыгаарлаашкыннар үезинде аныяк сайгарлыкчы шупту ажылчын олуттарын арттырып ап шыдаан.
