Эртен, февраль 21-де, Тываның эң-не ыраккы болгаш чедери берге кожууннарының бирээзи Тожу кожуунга тожу тываларының эң кол байырлалының бирээзи – ийи чылда чаңгыс катап демдеглээр Ивижилер байырлалы болуп эртер.
Кожууннуң культура-массалыг улуг хемчээ чүгле Тываның аңгы-аңгы булуңнарындан аалчыларны болгаш киржикчилерни эвес, а Сибирьниң үндезин чоннарының төлээлери – тожу тываларының онзагай культуразы-биле таныжар күзелдиглерниң сонуургактарны хаара тудар.
ТР-ниң Чазак Даргазының оралакчызы [id652022240|Айдын Чюдюк] баштаан фестивальдың организастыг комитеди чаңчылчаан национал байырлалды белеткээр болгаш эрттирер талазы-биле ажыл-чорудулганың планын бадылаан.
Февраль 21-де Тоора-Хем суурга кол хемчеглер болуп эртер, аңаа Тываның иви мал ажыл-агыйлыг кожууннарындан – Тожу биле Тере-Хөлден, ол ышкаш республикадан дашкаар ивижилер киржир.
Фестиваль ивижилерниң чаңчылчаан культуразын кадагалап арттырарынче онза кичээнгейни угландырган. Иви ажыл-агыйын деткиир болгаш хөгжүдер айтырыгларны, ол ышкаш тожу тываларының культурлуг өнчүзүн кадагалап арттырарының чугулазын сайгарган “төгерик столдар”, лекциялар болур.
– Тываның ивижилер фестивалы анаа-ла хөглээшкин эвес, а үндезин тожу тываларының амыдырал-чуртталгазының онзагай овур-хевирин кадагалап арттырар ажылдың чугула кезээ болур. Аныяк салгалга ивижилерниң дугайында болгаш ажыл-ижин дамчыдарынга идигни берип, хонаштар аразында харылзааны быжыглап, оларның чаңчылчаан ижин кадагалаарынга дузалаар – деп, Айдың Чюдюк демдеглээн.
Февраль 21-де Тожу кожуун чагыргазынга «Иви мал ажылын деткиири болгаш хөгжүдери» деп темага «төгерик стол» болур. Ол-ла хүн Тожу кожууннуң Тоора-Хем суурда мобильдиг кванториумну организастаар.
Тываның школаларынга "Ивилериниң езу-чаңчылдары, ужурлары болгаш культуразы" деп темалга лекцияларны номчуур. Тожу кожуун чагыргазының, Тываның Көдээ ажыл-агый, Күш-ажыл, Экономиктиг хөгжүлде, Юстиция, Арга-арыг, Өөредилге яамызыларының, Күрүнениң аңныыр комитединиң база Федералдыг почта харылзаазының Тывада эргелелиниң тускай мергежилдиглери ивижилерге деткимче көргүзериниң талазы-биле айтырыгларга дузаны көргүзер.
Байырлалдың байырлыг ажыдыышкынында тукту көдүрер, мурнакчы ивижилерни шаңнаар, Тожу кожууннуң ивижилериниң болгаш чурттакчыларының байырлыг чыскаалы база концерт программазын планнаан.
Ол ышкаш тожу тываларының чурттаар оран-савазы – тергиин тос чадыр дээш делгелге мөөрей, "Иви малым дерии чараш" деп ивини дерээниниң база ивижиниң кеттингениниң көргүзүг мөөрейи, "Ча адары" маргылдаа, ыяшты кончуг дүрген хирээлээш чарарынга мөөрей, ивижилер ортузунга "Ыраажы ивижи" деп ыры мөөрейи болур.
Оон аңгыда национал идик-хеп, аъш-чем, онзагай суй-белектер, аңчыларның тывыжындан ховар чүүлдерниң делгелгелерин организастаар.
Иви чарыжы – фестивальдың солун кезээ. Аңаа ивижилер малын кончуг дүрген эзертеп билирин, аваангыр болгаш дүрген чоруунга боттарын көргүзерлер.
Космонавт Кирилл Песков стал участником прямого эфира с Бурятией и Монголией
Сегодня, 12 апреля, в День космонавтики, прошел первый в истории сеанс прямого эфира, соединивший Бурятию и Монголию с Международной космической станцией.