Сентябрь 12-ден 14-ке чедир Тыва Республикага «Көшкүн чоннарның найыры» деп бир дугаар делегей чергелиг го маргылдаазы болгаш фестивалы болуп эртер. Кыдаттан, Моолдан, Казахстандан, Кыргызстандан делегациялар база кожа-хелбээ регионнардан – Бурятия биле Хакасиядан командалар маргылдаага келир. Маргылдааның организакчылары, го оюнун шаг-төөгүден бээр ойнап чораанын документилер-биле бадыткаан Россияның чаңгыс региону Тыва болганда, ол культураны уламчылап болгаш онзагай ролюн онзалап демдеглээр сорулгалыг ону эрттирер.
Го – 2,5 муң чылдар бурунгаар Бурунгу Кыдатка тывылган делегейде эң бурунгу стол оюннарының бирээзи. Кыдатта ону вейци, Кореяда – падук, а Россияда го деп адаары-биле билдингир.
Бо чазын Тываның Баштыңы Владислав Ховалыг Россияның го федерациязының президентизи Максим Волков-биле ужурашкаш, республикага ол оюнну сайзырадырын база делегей чергелиг фестивальды эрттирерин дугурушканын сагындыраал.
«Тывага гога сонуургалды катап оттурары чүгле спортчу эвес, а культурлуг болгаш төөгүлүг. Бистиң республикада ук оюн төөгүден бээр турган. Кыдат культураның, буддизмниң салдары, ол ышкаш этнограф Феликс Яковлевич Коннуң ажылдарында бижимелдер тывалар гонуң төвүт хевирин чүс ажыг чылдар бурунгаар ойнап чораанын херечилээн» – деп, республикада го федерациязының баштыңы Чамзырын Мижит демдеглээн.
Республика музейинде оюннуң езулуг самбыралары болгаш даштары амдыгаа чедир кадагалаттынып турар. Тус черниң чурттакчылары кырган-ачаларының го ойнап чораанын сактып турарлар. Бо чаңчыл хүн бүрүде амыдыралче база катап эглип кел чыдар.
Тывада го оюнунга сонуургал улгаткан. Амгы үеде республикада бо оюнга бежен хире кижи ойнап чоруур болза, ай санында оларга 15 хире чаа ойнакчы катчып турар. Ылаңгыя школачылар ортузунда онза сонуургалды оттурган, оларның хөй кезии регионнар аразының мөөрейлеринге тергиин көргүзүглерни көргүзүп турар.
