Тывага «Өөредилге» национал төлевилел-биле чаартылга ажылдары уламчылаар

Школаларның спортчу инфратургузуун чаартыр ажылдарны Тыва бо чылын база уламчылаар. Бо чылын «Уруг бүрүзүнүң чедиишкини» төлевилел-биле 20 хире сая рубльди алырын Тываның Баштыңы Владислав Ховалыг дыңнаткан. Ол акша-хөреңги-биле 13 көдээ школаларның спортчу инфратургузуун чаартыры планнаттынган.

Чурттуң Президентизи Владимир Путинниң эгелекчи саналы-биле эгелээн «Өөредилге» национал төлевилелди боттандырып, эрткен чылын спортчу шөлдерни эптеп тургускан, ийи көдээ спорт клубтарын чаа үениң дериг-херекселдери-биле четчелээн, Бии-Хем кожууннуң Туран хоорайның 1 дугаар школазының спорт залын септээн.

– Владимир Владимирович Путинниң эгелээшкининиң ачызында, ыраккы суурларда спортчу инфратургузугну хөгжүдүп турар бис. Чедери берге ыраккы суурнуң оолдары болгаш уруглары хостуг үезин хоккей шөлүнде эрттирип трурары өөрүнчүг-дүр. «Уруг бүрүзүнүң чедиишкини» федералдыг төлевилелден 1,5 сая рубльди ынаар тускайлаан – деп, Владислав Ховалыг национал төлевилелдиң акшаландырыышкыны-биле Тожу кожууннуң Ырбан суурда туткан хоккей шөлүнде ойнап турар уругларлыг видеону көргеш, тайылбырлаан.

Тываның Өөредилге яамызының медеглээни болза, бөгүн регионнуң өөредилге системазында уругларның немелде өөредилгезиниң 19 албан чери 20 муң оолдар болгаш уругларны хаара туткан. «Өөредилге» национал төлевилелдиң «Уруг бүрүзүнүң чедиишкини» федералдыг программазы-биле албан черлери улуг деткимчени ап турар.

Эрзин кожууннуң уругларның немелде өөредилге болгаш кижизидилге төвү 2023 чылда федералдыг программа-биле амгы үениң медиатөвүн дерээн – VR карак-шилдерин, видеокамераларны, фотостудия болгаш өске-даа херек чүүлдерни садып алган. Оолдар, уруглар улуг сонуургал-биле кичээлдеп, мультипликациялыг киноларны боттары үндүрүп, тыва тоолдарга үндезилээн мультиктерни чогаадып турарлар.

Тываның аграр лицей-интернады «Угаанныг теплицаны» ажылдаткан. Чаа шөл боду биолабораториялыг, материалдарны хайгаарап база чыырынга эптиг чер. Алдыгы классчылар немелде кичээлдер үезинде ногаа культураларын эгезинден эгелеп өстүрүп ажаар шенелделерни кылып турар.

Барыын-Хемчик кожууннуң Кызыл-Мажалык суурда чогаадылга төвү федералдыг төлевилелдиң акша-хөреңгизи-биле спортчу чадаг-тергелери база робототехника конструкторларын садып алган. 2023 чылдың частан бээр 25 оолдар, уруглар кожууннуң немелде өөредилге төвүнде чаа угланыышкын – чадаг-тергелиг даг аян-чорукту шиңгээдип эгелээн.