Тыва 2026 чылда республикага болуп эртер IV делегей чергелиг сарыг шажын шуулганынга белеткел ажылдарын чорудуп турар. Шуулганның хемчеглерин белеткеп, эрттиреринге дорт хамаарылгалыг яамылар, албан черлер, культура, шажынчы болгаш өөредилге албан черлериниң төлээлери кирген оргкомитет неделя санында чыглып турар. Тываның Баштыңы Владислав Ховалыг ээлчеглиг хуралды бо удаада удуртуп эрттирген.
Ол бодунуң телеграм-каналынга хуралдың киржикчилери чаңгыс үзел-бодалга келгенин демдеглээн: шажын амгы ниитилелде сүлде-сүзүк өөредиин нептередиринге дузалаар. Амыдырал болгаш чурагайжыдылга дүрген шимчеп турар үеде, ол кончуг чугула.
«Мөзү-шынар кижизидилгези болгаш үнелиг чүүлдерже чүткүл кол талалар бо-дур. Шажынчы езу-чаңчылдарны сургап өөредириниң дүрүмнерин тургузарынга, чүс-чүс чылдарның арга-дуржулгазын кадагалап арттырып тургаш, оларны өөредилге программаларынче шажынчы эвес, а культурлуг болгаш төөгүлүг өнчү кылдыр каттыштыргаш киирип болур» – деп, Владислав Ховалыг бижээн.
Август айда болуп эртер шуулган каш хонук уламчылаарын сагындыраалыңар. Ооң баш бурунгаар программазынче шажынчы, эртем, өөредилге, спортчу, культурлуг-хөглээшкин темаларынга элээн каш он-он хемчеглерни киирер кылдыр ажылдап кылып турар.
«Сүбедей» универсалдыг спорт комплекизи, «Түбтен Шедруб Линг» сарыг шажын хүрээзи, Тываның күрүне университеди шуулганның кол шөлдери апаар. Кол болуушкуннарның санында улуг театржыткан көргүзүг, буддизмниң ховар эдилелдериниң делгелгелери, эртем шөлдери, «Калмыкия – Тыва – Бурятия» найырал фестивалы, шиилер, билдингир тыва бөлүктерниң киржилгези-биле дириг хөгжүм концерттери бар. Хороо езулалы болгаш Буддизмниң Үш Эртинезинге хөгжүмнүг өргүл езулалы база планнаттынган. Амгы үеде программаны тодарадып, эдип, таарыштырып турар. 2026 чылдың февральда сөөлгү хевири тургустунар.
Бо чылдың сентябрьда Калмыкия Республикага III делегей чергелиг буддийжи шуулган эрткен болза, баштайгы ийизи Бурят Республикага болуп эрткенин сагындыраал. 2023 биле 2024 чылдарда Индия, Кыдат, Вьетнам, Таиланд, Мьянма, Шри-Ланка, Лаос, Непал, Моол, Бангладеш, Камбоджа база Бутан дээш, 14 даштыкы чурттарның делегациялары аңаа киришкен.
Тываның Баштыңы Владислав Ховалыг Тубтен Шедруб Линг хүрээзинде Россияның буддийжи университедин ажыдып турар байырлалга аалчы болуп келген Калмык Республиканың Баштыңы Бату Хасиковтан шуулганның чаңчылчаан эстафетазын хүлээп алган.
Бату Хасиков III делегей чергелиг буддийжи шуулганның демдээ – Будданың овур-хевирин, Бодхи ыяжын, ыдыктыг лотосту сиилбээн тураскаалды Владислав Ховалыгга белекке берген.
Владислав Ховалыг Тывага шуулганны бедик деңнелге организастаары-биле бүгү күжениишкиннерни салырын айыткан. Тываның Баштыңы буддийжи шуулган чоннарның, делегейже көрүштүң, үнелиг чүүлдерниң демнежилгезин деткиир деп демдеглээн.
Россия Федерациязының Президентизи Владимир Путинниң 2026 чылда чарлааны Россияның чоннарының чаңгыс деминиң чылының мурнады хөгжүдер угланыышкыннарынга база Национал политиканың чаа эчис сорулгазын боттандырарынга ол дүгжүп турар.
2024 чылдың февраль 13-те Москвага буддийжи өөредилгени болгаш шинчилелдерни деткиир фондунуң Тургузукчулар чөвүлелиниң хуралынга IV делегей чергелиг сарыг шажын шуулганын Тывага эрттирер дугайында шиитпир хүлээп алдынган. Россияның Президентизи Владимир Путин 2024 чылдың сентябрьда республикага аалдап чорааш, бо эгелээшкинни деткээн.