Тывага спорт объектилериниң тудуу уламчылаар

Тывага спорт болгаш күш-культура сайзырадыр күрүне программазынче немей киирген «Бизнес-спринт» деп чаа федералдыг төлевилелдиӊ шугуму-биле «угаанныг» спорт шөлдерин, модульдуг спорт залдарын тудуп эгелээр.

ТР-ниң Спорт яамызы бо чылын Кызылга ийи «угаанныг» спортчу шөлчүгешти, кожууннарга “Эзирлер уязы” – биче хемчээлдиг он хүреш залын, Эрзин биле Өвүр кожууннарга ангар хевирниң ийи спорт залын, Шагаан-Арыг хоорайга күш-культура болгаш кадыкшыл комплекизин тудар болгаш дөрт спорт албан черлериниң капитал септелгезин чорудар сорулга салдынганын дыңнадып турар.

Амгы үеде республикада 413 спорт объектизинде үштен сезен хар чедир назылыг чурттакчы чоннуң 53 хуузу спорт-биле өңнүктежип турар. Спорт талазы-биле эң-не идепкейлиг кожууннарга Сүт-Хөл, Өвүр, Чаа-Хөл, Тере-Хөл, Чөөн-Хемчик кожууннар хамааржыр.

– «Бизнес-спринт» федералдыг төлевилелдиӊ ачызында бо чылын хары угда «угаанныг» ийи спорт шөлүн тудар бис. Ук объектини амгы үениӊ эки шынарлыг спорт дериг-херекселдери-биле дерииринден аӊгыда, интернетти база кожар. Келген кижи бүрүзү бодунуӊ белеткелин таарыштыр тургузуп алыр аргалыг апаар. «Угаанныг» спорт шөлдери чонну спортка хандыкшып, амыдыралдың кадык овур-хевиринче ижигип, кичээнгей салырынга улуг салдарлыг болур – деп, спорт сайыды Субудай Моӊгуш

Россияныӊ Чазааныӊ Даргазы Михаил Мишустинниӊ регионнарга үш чыл иштинде 9 млрд рубльду үндүрериниӊ дугайында айтыышкынынг адын салган. Тывага бо чылын «Бизнес-спринт» федералдыг төлевилел-биле 20,2 сая рубльди, 2023 чылда 20 сая рубльди, а 2024 чылда 60 сая рубльди үндүрерин республиканыӊ Спорт яамызы дыӊнаткан.