Тываның Баштыңы Владислав Ховалыгның эгелээшкини-биле 2023 чылдан тура регионнуң өөредилге адырынга шыырак башкыларны белеткээр угланыышкынныг «Мээң башкым» төлевилели республикада боттанып турар. Владислав Ховалыг бо чылдың тос айларында төлевилелдиң түңнелдерин илеткээн: шылгараңгай 105 башкы болгаш 20 студент деткимчени алган.
"Төлевилел профессионал өзүлдеге немелде аргаларны ажыдар: башкылар өске регионнарга стажировкаларны эртип, өөредилгениң чаа аргаларын билип ап, профессионал көрүжүн калбартып турар. Школачылар мергежилин эртежик шилип алырынга деткиир тускай психологтуг болгаш педагогиктиг класстарны болгаш "ЯпедКЛАСС" деп бөлүктерни тургускан. Аныяк специалистерге мергежилин бүзүрелдиг эгелеп, школа коллективинге артып каарынга дузалаар тускай рольду "Мен башкы мен" деп программада көрген. Башкы угланыышкынында салым-чаяанныг студентилер Тываның Баштыңының стипендиязы-биле үнелелди ап турар, а профессионал мергежилдер мөөрейлери боттарының билиг-мергежилин көргүзүп, арга-дуржулгазын үлежир арганы башкыларга берип турар» – деп, Владислав Ховалыг бодунуң эгелээшкининиң күүселдезин илеткеп тура, демдеглээн.
Төлевилел езугаар бо чылын 32 башкыга 20 муңдан бир сая рубль чедир акша шаңналдарын тывыскан. Шаңналдарны чүгле тиилекчилер эвес, а аңгы-аңгы профессионал мөөрейлерге шаңналдыг черлерже кирген башкылар база алган. Оларның аразында «Чылдың башкызы», «Тыва Республиканың тергиин дагдыныкчызы», «Тыва Республиканың психолог башкызы», «Чүрээмни уругларга берип тур мен», «Тыва дылдың болгаш төрээн чогаалдың тергиин башкызы» дээш, оон-даа өске билдингир мөөрейлер бар. Ындыг деткимче башкыларга ам-даа сайзыраар, бодунуң мергежилин экижидер, чаа бедиктерни чүткүүр хей-атты берип турар.
Шилилде мөөрейниң түңнелдери-биле 10 башкы чаартылгалыг өөредилге программаларын болгаш технологияларын ажыглааны дээш Тываның Баштыңының премиязын алганнар. Бо төлевилел башкыларны чүгле деткиир эвес, а өөредилге чорудуунда чаа идеяларны болгаш методикаларны ажылдадыр шөлдү тургускан.
Оон аңгыда, удуртукчу кадрлар курлавырында 40 кордакчы Калининград хоорайга стажировканы эрткен. «Өөредилге-кижизидилге чорудуун организастаарынга чаа арга-хевирлерни киирбишаан, өөредилге шөлүн чаңгыс аайлаарын хандырары» деп мергежил бедидер программага өөредилге эрткен. Башкылар орук, чурттаар оран-сава болгаш өөредилге дээш төлевирни алганнар.
Төлевилел күүселдези-биле республикада чаа туттунган школаларга «ЯпедКЛАСС» психолог-педагогиктиг класстарны хөгжүдеринче онза кичээнгейни углаан 10 ындыг класс ажыттынган. Көдээ ийи школаның өөреникчилери Ярославльга болуп эрткен К.Д. Ушинский аттыг бүгү-российжи педагогика олимпиадазының түңнел чадазынга киришкен. Оларның куратору Ярославльдың күрүнениң педагогика университединге мергежилин бедиткен.
Чурттуң педагогиктиг дээди өөредилге черлериниң студентилеринче база кичээнгейни салган. Эрткен 2024/2025 өөредилге чылында Тываның күрүне университединде, Россияның күрүнениң пеадгогика университединде, В.П. Астафьев аттыг Красноярскиниң күрүнениң педагогика университединде, Томскиниң күрүнениң педагогика университединде, Новосибирскиниң күрүнениң педагогика университединде, ол ышкаш Иркутскиниң регионалдыг педагогика колледжизинде, Новосибирскиниң профессионал-педагогиктиг колледжизинде база Кызылдың педагогика колледжизинде өөренип турар 20 студент Тыва Республиканың Баштыңының стипендиязын алганнар. Бо чылдың төнчүзүнде деткимче алырынче ээлчеглиг мөөрей чарлаттынар.
