Тываның агроүлетпүр техникуму чаартылгалыг өөредилге төвү апарган

Тываның агроүлетпүр техникуму «Өөредилге» национал төлевилелдиң «Профессионалитет» федералдыг төлевилелдиң «Көдээ ажыл-агый» өөредилге-бүдүрүлге адырының баазалыг өөредилге албан чери.

Төпке 2023 чылдың сентябрь 1-ден эгелеп, аныяктар арга-арыг болгаш арга-парк ажыл-агыйының тускай мергежилиниң, агрономнуң, технологтуң база үнүш өстүрер эртемниң мастериниң билиглерин, мергежилин болгаш арга-дуржулгазын амгы шагның дериг-херекселинге болгаш көдээ ажыл-агый техниказынга өөренип ап турарын ТР-ниң Өөредилге яамызы дыңнаткан.

– «Профессионалитет» төлевилелдиң ачызында сургуулдар күш-ажыл рыногунга хереглелдиг. «Көдээ ажыл-агый» адырынга өөренип тура, сургуулдар чүгле баштайгы билиглерни алыр эвес, а харын-даа бүдүрүлге байдалдарынга эң-не чоок чаартылгалыг дериг-херекселдер-биле дериттинген лабораторияларның ачызында практиктиг мергежилдерни база алыр – деп, директорнуң оралакчызы Инга Балчый-оол демдеглээн.

Россияның Президентизи Владимир Путинниң эгелекчи саналының ачызында Тывада ортумак профессионал өөредилгениң системазы элээн чаартынган. Регионнуң 11 техникумунда бүдүрүлге мастерскаялары бүрүнү-биле дериттинген.

«Профессионалитет» төлевилелдиң шиңгээткенинден эгелээш, Тываның агроүлептүр техникумунда он ажыг сүт болбаазырадыр, арыглаар, хүлээп алыр, хайындырарынга белен эъттен аъш-чем бүдүрер, ногаа культураларын болгаш өзүмнерин өстүрер, тараа база ногаа культураларын тарыыр база ажаар лабораторияны дерээн.

Лабораторияга сургуулдар сүт болбаазырадырын болгаш сүт аймааның продукциязын кылырын, эъттиң морфологтуг база химиктиг тургузуун тодарадырын, үрезиннерни, көдээ ажыл-агый культураларының тарыыр материалдарын тарыыр мурнунда болбаазырадырын, үнүштерниң көвүдээриниң аргаларын, көдээ ажыл-агый культураларының тарыыр материалдарының өзүлдезин өйлээр болгаш сайзыраарын өөренир.

Техникумда көдээ ажыл-агый ажыглалдыг черлер бар – 360 гектар тарылга шөлү болгаш 2000 гектар чедир улгаттырары көрдүнгени-биле, малдың баш санының арат ажыл-агыйы. Үрезин материалдарының курлавыр хемчээли 10 тонна чедир үнелеттинип турар.

Сургуулдарга эң-не солун чүүл – тарыыр культураларның шинчилелдериниң түңнелдеринге үндезилеп, хову культураларын өстүрер технологтуг картазын тургузары. Ол ышкаш тарылга ажылдарының эгези-биле «Чер ажылының чурагайы» аргаларны чаа технологияларны ажыглавышаан, ажыглап эгелээр.

Ниитизи-биле «Профессионалитет» программа талазы-биле Тывада Кызылдың, Сарыг-Септиң, Чадаананың база Балгазынның техникумнарының көдээ ажыл-агый адырында беш чүс ажыг сургуул өөренип турар. Бо хүнде 215 кижи «Профессионалитет» федералдыг төлевилелдиң өөредилге программазын чүгле Балгазынның агроүлетпүр техникумунда шиңгээдип турар.

Адырның программазынче кирерде, чүгле ниити билиг дугайында аттестат херек: мөөрей шупту демдектерниң ортумак баллы-биле эртер. Немелде кирер шенелделер болгаш шылгалдалар херек чок.
Хүлээп алыышкын кампаниязы 2024 чылдың июнь 20 соонда, эгелээр. Школачыларның часкы дыштанылгаларының үезинде Тываның техникумнарынга болгаш колледжтеринге «Ажык эжиктер хүннери» болуп эртер.