Тываның Баштыңы Владислав Ховалыг Россияның сайгарлыкчы чорук хүнүнге тураскааткан хемчеглерге киржип, регионнуң сайгарлыкчы чорукту деткиир фондузунуң эрттирип турары тус черниң продукциязының делгелгезин көрген.
Эш-хуу байдалга эрткен ужуражылгада киржикчи бүрүзү бодунуң сагыш-сеткилин дүвүреткен айтырыгларны илередир аргалыг болган. Бизнесменнер аңгы-аңгы темаларны – ажыл-херээн эгелээринге деткимче болгаш экспорт рыногунче тус черниң барааннарын үндүр садарынга дузадан эгелээш, бүдүрүлгениң шынарын, хереглекчилерниң айыыл чок чоруун болгаш чижилгени хандырарының аргазы кылдыр продукцияны стандартизастаарынга чедир сонуургаан.
Тываның Чазаа күзелдиг кижилер хууда ажыл-херээн ажыдып ап болур кылдыр хөйнү кылып турарын Владислав Ховалыг демдеглээн. Эгелеп чоруур болгаш амгы сайгарлыкчыларга херек бүгү-ле институттар – «Мээң бизнезим» төп, Сайгарлыкчы чорукту деткиир фонд, Магадылал фондузу, Кластерлиг хөгжүлде төвү дээш, оон-даа өске албан черлери тургустунган.
Республиканың экономиказынче, сайгарлыкчы чорукка дээш, чылдың-на бюджеттен эвээш дизе 30 хире млрд рубльди тускайлап турар. 2025 чылда чүгле Сайгарлыкчы чорукту деткиир фонд таварыштыр бизнеске 41 сая рубльдиң дорт дузазын көргүскен.
Тываның Баштыңы экономиканың сайгарлыкчы чорук адыры көскү өзүлдени чедип алганын демдеглээн. Сөөлгү беш чылда Тывада сайгарлыкчылар саны 1,5 катап көвүдээн. Бөгүнде биче болгаш ортумак сайгарлыкчы чорук адырында 42 муң ажыг кижи ажылдап турар, ол беш чыл бурунгаар турганындан үш катап хөй. Садыг-сайгарылга эргилдези 2,6 катап, азы чылда 25,2-ден 66,7 млрд рубльге чедир өскени – төлевилелдер чедиишкинниг болганын бадыткап турар.
Владислав Ховалыг төрээн Тывазының хөгжүлдезинге үлүг-хуузун киириштирип, чаңгыс чер чурттугларынга ажылчын олуттарны ажытканы дээш сайгарлыкчыларга четтиргенин илереткен. Тускай шериг операциязының девискээринде дайынчыларга ачы-дузаны чыырынга болгаш чорударынга идепкейлиг киржип турар бизнес-ниитилелдиң төлээлеринге өөрүп четтиргенин аңгы илереткен.
«Силерге идегелдиг партнерларны, боттарыңарга бүзүрелди, бизнезиңерге быжыг өзүлдени күзедим» – деп, республика Баштыңы сайгарлыкчыларга күзээн. Регионнуң чазаа «Тываның алдарлыг сайгарлыкчызы» деп атты тургузар төлевилелди белеткээнин ол дыңнаткан.
Бо хүндүлүг ат Россияның чамдык регионнарында бар, ол бизнесменнерниң экономиктиг хөгжүлдеге, чаа ажылчын олуттарны тургузарынга киирген онза үлүг-хуузун, регионга хөй чылдар дургузунда ак сеткилдиг ажылын демдеглеп турар.
Владислав Ховалыгның бодалы-биле алырга, биснес экономиканың болгаш хөй-ниити амыдыралының хөй-ле адырларында күрүнениң чөленгиижи болуп, улуг социал чүъктү бодунга ап, Тываның экономиктиг идепкейжи чурттакчы чонунуң үштүң бир кезиин ажыл-биле хандырып, орулганы берип турар.
