Тываның Баштыңы Владислав Ховалыг Ангара-Енисей регионда өңнүг, ховар, дыка ховар металлдарны долузу-биле болбаазырадыр кластерниң удуртулга чөвүлелиниң составынче кирген
Владислав Ховалыг ноябрь 7-де Саяногорск хоорайга Айыыл чок чорук чөвүлелиниң секретары Сергей Шойгунуң удуртканы РФ-тиң Айыыл чок чорук чөвүлелиниң аппарадының чанында Сибирь федералдыг округта чиг эттерни долузу-биле болбаазырадыр адырда төлевилелдер күүселдезин деткиир албан черлер аразының үнүүшкүннүг ажылчын хуралынга киришкен.
Үнүүшкүннүг хуралдың киржикчилери Ангара-Енисей девискээринде өңнүг, ховар болгаш дыка ховар чер металлдарын долузу-биле болбаазырадыр кластерни тургузарының дугайында айтырыгны сайгарып чугаалашкан.
Россияның Үлетпүр болгаш садыг-сайгарылга яамызының, Бойдус яамызының, Энергетика яамызының, Экономиктиг сайзырал яамызының, «Росатом», «Ростех», «Русал», «Норильский никель», «Росхим», «Хайленд Голд», «Красцветмет», «ХимМед» дээн ышкаш чурттуң эң улуг үлетпүр корпорациялар удуртулгазының төлээлери, Сибирь федералдыг округтуң субъектилерниң баштыңнары төлевилелдиң кол киржикчилери болган.
«Металлдар казып тыварын болгаш болбаазырадырын, мурнакчы материалдарны, микроэлектрониканы болбаазырадыр, энергетика шиитпирлерин болгаш кылымал угаан системаларын каттыштырыптар экосистема тургустунар. Чурттуң турум чаартылгалыг хөгжүлдезиниң үндезининче Сибирьниң курлавыр күчү-шыдалын шилчидери кластерниң сорулгазы болур деп, Сергей Кужугетович демдеглээн» – деп, Владислав Ховалыг хурал соонда бодунуң блогунда бижээн.
Үнүүшкүннүг хуралдың киржикчилери бирги ээлчегде кол төлевилелди боттандырар ат салдынган «орук карталарын» өөренип көрбүшаан, чыл төнчүзүнге чедир Кластерниң техниктиг болгаш экономиктиг хөгжүлде планын ажылдап кылыр, Төлевилел офизин база Удуртулга чөвүлелин тургузар шиитпирни бадылаан, ол ышкаш чаңгыс аай НИОКР программазын база кадрлар белеткээр комплекстиг программаны тургузарын ажылдап кылыр.
Владислав Ховалыг Россия Федерациязының Чазааның Даргазының бирги оралакчызы Денис Мантуровтуң баштааны Кластерниң удуртулга чөвүлелиниң составынче кирер саналды хүлээп алганын дыңнаткан.
Ангара-Енисей девискээринде өңнүг, ховар болгаш дыка ховар чер металлдарын долузу-биле болбаазырадыр кластерниң мурнады боттандырар төлевилелдериниң аразында 2030 чылаг чедир Тастыг чыдынындан руда концентрадындан литий гидроксидин болбаазырадыры кирип турар.
Кластер муң-муң ажылчын олуттарны тургузуп, үндүрүг баазазын элээн калбартып, транспорт болгаш инженер инфратургузуун эде чаартып, ол ышкаш энергетика адырының хөгжүлдезинге идигни берип, таарымчалыг хоорай хүрээлеңин тудуп, профессионал өөредилгениң чедингирин бедидип, Сибирьден салым-чаяанныг аныяктарның өскээр көжүп чоруурун болдурбазынга күштүг идиг апаар дээрзин ужуражылганың киржикчилери демдеглээннер.
