Тываның Баштыңы бистиң үениң маадыры – Каң-Демир Лопсан-Комбу-биле ужурашкан

Владислав Ховалыг Украинага тускай шериг операциязынга киржип чораан Каң-Демир Лопсан-Комбу-биле ужурашкан. Шериг операциязының үезинде дайынчы эжин камгалап каанының дугайында «Малахов» телепрограммага көргүскен ооң төөгүзү дыка хөй кижилерни хаара тудупкан.

Каң-Демир Лопсан-Комбу мөзү-бүдүштүг, хөй сөс чок кижи. Ол болуушкунну кымга-даа чугаалаваан. Даай-авазы Алена Серен телепрограмма тырттырар деп турарын билип кааш, дыка кайгаанын чугаалаан. Лопсан-Комбу, авазы, дуңмалары – Шагаан-Арыг хоорайның чурттакчылары. Ада-ие улуг оглундан аңгыда, кыстыг, оолдуг. Каң-Демирниң күзели – өртчү болур, ол ышкаш дээди шериг эртем чедип алыр сорулгалыг.

– Каң-Демирге Шагаан-Арыгга ажылды бээринге беленин дыңнадып, дарый шиитпирни үндүргени дээш, Россияның Онза байдалдар яамызының Тывада Кол эргелелиниң удуртукчузу А.С. Артемовка четтиргеним илереттим. Өөредилгезин база шиитпирлептер бис. Чоок кижилериниң чанынга амдыызында күш кирип алырын, чагып чугааладым. Авазының кадыкшылынче сагыш човап турар болду.

Аяна Эрес-ооловна беш чыл бурунгаар кылаштавайн барган, ам удавас «Серебрянка» санаторийинге кадыкшылын быжыктырар деп турар. Тускай эртем-шинчилел институттарынга ханы шинчилгени организастаар даалганы Тываның Кадык камгалал яамызынга бердим. Бар-ла аргаларны ажыглап, экижип келиринге идегээр херек – деп, Тываның Баштыңы ужуражылга соонда, бодунуң блогунга бижээн.

Улуг-Хем кожуун чагыргазының Лопсан-Комбунуң өг-бүлезинге Шагаан-Арыг хоорайга чаагайжыттынган квартираны бээр дээн шиитпирин Владислав Ховалыг база деткээн. Республиканың Чазаа бистиң үениң маадырын шаңнаар дилег бижикти РФ-тиң Камгалал яамызынче кииргенин ужуражылга үезинде дыңнаткан. Шак-ла ындыг дилегни Каң-Демир Лопсан-Комбунуң албан-хүлээлге эрттирип турган кезээниң командылалы база киирген. Ол Белгород облазында танкыга удур шериг кезээнге шериг хүлээлгезин эрттирген. А тускай шериг операциязынче керээ чаргаш, киришкени ол.

«Тускай шериг операциязында оолдар, бот-боттарыңарны деткижип, бодуңарны камнап, онча-менди ээп чанып келиңерерни күзедим» – деп, Каң-Демир Лопсан-Комбу тускай шериг операциязының киржикчилеринге чагаан.

Каң-Демир Лопсан-Комбуга база төлептиг оолду кижизиткен ооң ада-иезинге республиканың күрүне шаңналдарын тыпсырын Тываның Баштыңы саналдаан. Чаа чыл бүдүүзүнде Тываның Чазаанга күрүне шаңналдары тыпсыр байырлыг езулалдың чугула кезээнде оларның кайгамчык үлегерлиг чижээн онзагайлап демдеглээр.