Тываның Баштыңы «Өг-бүлениң беш чылы» деп чаа төлевилелди чарлаан

Тываның Баштыңы Владислав Ховалыг Өг-бүле чылын доозуп, Россияда болгаш республикада Ада-чурт камгалакчызының чылын ажытканынга тураскааткан байырлыг хемчегни ажыдып тура, Тыва чаштарның төрүттүнери-биле мурнуку черде регион болуп артканын демдеглээн.

Эрткен чылын Тывага 5600 уруг төрүттүнген, оларның хөй кезии хөй ажы-төлдүг өг-бүлелерде. Чурттакчы чоннуң ортумак назы-хары-биле Россияда эң аныяк регионнарның бирээзи болуп турары – республикада демографтыг байдалдың онзагайында деп ол чугаалаан.

Тывада Өг-бүле чылында республикада өг-бүлелерни, ооң иштинде тускай шериг операциязының киржикчилериниң өг-бүлелерин, ол ышкаш хөй ажы-төлдүг, аныяк болгаш эвээш орулгалыг өг-бүлелерни деткииринче угланган хөй хемчеглерни эрттирген.

Культура, спорт болгаш кадык камгалал албан черлериниң хөй кезии хөй ажы-төлдүг өг-бүлелерге ачы-дузаларны чедирип турар. Сайгарлыкчылар база деткимче хемчеглеринге каттыжып, эм-таң садыгларынга, уруглар болгаш өөредилге төптеринге, эмчи клиникаларынга чиигелделерни көргүскеннер. Оон аңгыда, деткимчениң чаа хемчеглерин база киирген.

– Тускай шериг операциязының киржикчилериниң өг-бүлелеринче онза кичээнгейни салган. Республиканың уруглар лагерьлеринге аңгы квота езугаар оларның ажы-төлүнге халас дыштанылганы организастаан. Бо чылдан эгелеп күрүне болгаш муниципалдыг уруглар садтарынга ажы-төлү барып турар тускай шериг операциязының киржикчилериниң өг-бүлелерин ада-ие төлевирлеринден шуут хостаан бис.

Чаа өөредилге чылындан эгелеп, 5-тен 11-ги класстарга чедир өөреникчилерниң чемненир өртээнге база 1-ден 11-ги класска чедир хөй-ниити транспортунга чоруурунга чаңгыс катап чартык компенсацияны киирер бис. Хөй ажы-төлдүг, инвалид ажы-төлдүг, тускай шериг операция киржикчилериниң өг-бүлелеринге деткимче хемчеглерин калбартырын уламчылаар бис – деп, Владислав Ховалыг демдеглээн.

Тываның Баштыңы эрткен чылдың шупту чедиишкиннерин демдеглеп тура, өг-бүле дээш сагыш човаашкынның чугулазын онзалап, республикада өг-бүлелерге деткимчениң хөй аргаларын ам-даа уламчылаарын айыткан.

– Өг-бүле чылы Тиилелгениң адынга, Ада-чуртунга ынакшылы болгаш шынчы чоруунга, Россияның болгаш Тываның маадырларының маадырлыг чоруунга, чонувустуң эң-не эки чаңчылдарынга ажы-төлдү кижизидеринге биске улуг идигни бээр Россияда болгаш Тывада Ада-чурт камгалакчызының чылынга эстафетаны дамчыткан! Өг-бүле чылын хаап тура, дараазында беш чылда база уламчылаарын саналдап тур мен. Бо чылын эгелээн “Өг-бүле” деп национал төлевилелдиң кезии болур “Өг-бүлениң беш чылы” деп чаа регионалдыг төлевилелди чарлап тур мен – деп, ол медеглээн.

Өг-бүлениң үнелиг чүүлдерин быжыглаарынче угланган чаа “Өг-бүле” национал төлевилелдиң боттанылгазы 2024 чылдан эгелээн. 2025 чылдың январь 1-ден бүгү чуртта болгаш Тывада өг-бүлениң хереглелдерин өөренип көрген, база оларның негелдерин деткииринге таарыштырган хемчеглерлиг чаа эгелээшкиннерни боттандырып эгелээн.