Неделя санында эртер аппарат хуралынга, бажың өрттери-биле байдалды сайгарып чугаалашкан. Россияның Онза байдалдар яамызының Тывада Кол эргелелиниң медээзинден алырга, эрткен неделяда өртке удур албан черлери 18 өрт кыйгыртыынче үнген.
Ооң мурнунда чылын чуртталга секторунга 17 өрт бүрүткеттинген. 2018 чылдан бээр, республикада печка одаар бажыңнарга өрттерни болдурбас дээш, хөй ажы-төлдүг өг-бүлелерге ыш медээчизин халас салып турар. Тываның Баштыңы Владислав Ховалыг ол талазы-биле ажылды дүргедедерин харыысалгалыг ведомстволарга болгаш муниципалдыг тургузугларга дааскан.
«Одалга сезону эгелээрге-ле печканы шын эвес ажыглаанындан угарлыг ыштан хораннаныр айыыл улгады бээр. Тываның Чазаа 2018 чылдан эгелеп хамаатыларның социал берге бөлүктеринге автономнуг өрт медээчилерин салыр ажылды чорудуп турар. Ол үениң дургузунда 4500 ажыг бажыңда ындыг херекселдерни салган» – деп, Владислав Ховалыг дыңнаткан.
Россияның Онза байдалдар яамызының Тывада Кол эргелелиниң сан-чурагайы-биле алырга, 2025 чылдың эгезинден бээр республикага 946 өрт болган, 2024 чылга деңнээрге 77 хөй. Кызыл болгаш Ак-Довурак хоорайда, ол ышкаш Тываның 17 көдээ кожууннарының 10-унда – Кызыл, Таңды, Тес-Хем, Барыын-Хемчик, Чаа-Хөл, Бай-Тайга, Өвүр, Сүт-Хөл, Чеди-Хөл база Тере-Хөлде өрттер саны өскен.
Владислав Ховалыг өрт камгалакчыларының тайылбырынга хамаарыштыр чугаалап тура, чуртталга бажыңнарынга, ылаңгыя социал чедимче чок өг-бүлелер бөлүүнде улустуң чурттап турар черлеринге өрт медээчилерин халас салырын тус чер чагыргаларының удуртукчуларынга сагындырган.
2023 чылдан эгелеп бүгү Россияда ол ажылды тус чер эрге-чагырга органнарынга хүлээндирген. Тывада республика бюджединиң акшаландырыышкыны-биле ындыг медээчилерни 2018 чылдан тургузуп эгелээн. Бо хемчег бажың өрттериниң, ылаңгыя ооң уржуундан өлүп-хораар чоруктуң санын эвээжеткен. 2025 чылда алды кижи чок болган, ооң мурнунда чылга деңнээрге ийи катап эвээш. Ол ышкаш когараннар саны база эвээжээн, 39-тан 20-де келген.
ТР-ниң Күш-ажыл болгаш социал камгалал яамызының дыңнатканы-биле алырга, бо чылын 1464 өрт медээчизин салыры планнаттынган. Амгы үеде планның 77 хуузу күүсеттинген, ам 331 херекселди салыры арткан.
Владислав Ховалыг бар дериг-херекселдерниң ажылдап турарын доктаамал хыналдага алырын тус чер эрге-чагыргаларынга дааскан. Ыш үнген үеде медээчилерниң ажылдавайн барган ужуру батарейлерин үе шаанда солуп албаанындан болуп турары билдинген.
Тываның Баштыңы чүгле хайгааралында өг-бүлелерде эвес, а печка одаар бажыңнарда чурттап турар шупту кижилерниң бажыңнарынга өрт медээчилерин салырын муниципалдыг коллегларынга сүмелээн. Ол дериг-херексел чүгле өрттү эвес, а өрээлде ыш тыптып келгенин база дыңнадыптар. Печканы шын эвес ажыглаанындан угарлыг ыштан хораннангаш чок болурунуң айыылын каш катап эвээжедир: «Шупту хуу бажыңнарга ыш медээчилерин салыры чугула, ол дыка хөй кижилерниң амы-тынын камгалап болур» – деп, Владислав Ховалыг демдеглээн.
Регионнуң удуртукчузу хөй ажы-төлдүг база социал айыылдыг байдалда өг-бүлелерниң бажыңнарынче квартал санында хыналдаларны организастап, ол ышкаш хуу секторнуң чурттакчыларынга угарлыг ыштан хоранналырының уржуктарын сагындырып, печканы шын ажыглаарының дугайында тайылбырны чорударын Күш-ажыл болгаш социал политика яамызы биле тус чер бот-башкарылга органнарынга дааскан.
