Тываның Баштыңы Владислав Ховалыг биле Камбы-Лама Лоден Шераб ужурашкаш, IV делегей чергелиг буддийжи шуулганга белеткел ажылдарының дугайында чугаалашкан. Аңгы-аңгы чурттардан шажын башкылары болгаш чүдүкчүлер келир болганда, хемчеглерниң ужур-уткаларын база чалаттырар аалчыларның даңзызын аразында сайгарган.
«Ол чүгле албан езузунуң ужуражылгазы эвес, а эксперттерниң, эртемденнерниң болгаш чүдүлге баштыңнарының аразында ханы чугаа болуру чугула. Бо хүнде иштики амыр-тайбыңга, энерел сеткил болгаш кээргээчел чорукка сонуургал өзүп турарын көрүп турар бис. Буддийжи философия амыр-тайбыңны болгаш чоннар аразында эп-найыралды быжыглаарынга дузалаар амгы үениң хөй-ле айтырыгларынга харыыларны берип турар» – деп, Владислав Ховалыг бодунуң телеграм каналында бижээн. Шуулган регионнуң хөгжүлдезинге-даа, национал бот-тускайлаңын быжыглаарынга-даа күштүг идигни бээр дээрзинге ол бүзүрелин илереткен.
Тываның Баштыңы оргкомитет кежигүннери-биле кады удавас болур хемчегниң кол болуушкуннары эртер база аалчылар чыттырар кол объектилерни эргип көрген. Шуулганны чедиишкинниг эрттиреринге шөл бүрүзү чугула рольду ойнап турарын ол демдеглээн. «Аалчыларны хүлээп алырындан аңгыда, езу-чаңчылдарын камныг кадагалап, чугаалажылгага ажык регион кылдыр Тываны көргүзер ужурлуг бис» – деп, Владислав Ховалыг демдеглээн.
Тываның Баштыңы чүс-чүс шуулган киржикчилери уткуур объектилериниң бирээзи – Кызылдың аэропортунга барып четкен. Бо чылын аэропорт комплекизинге национал овур-хевирни сиңирип, айыыл чок чоруктуң амгы үениң стандарттарынга дүүштүр улуг септелге ажылдарын планнаан. Тывага бир дугаар келген аалчыларга чылыг болгаш эптиг байдалды тургузары – аэропортту чаартырының сорулгазы.
Владислав Ховалыг шуулганның база бир кол шөлү – «Сүбедей» спорт комплекизинге база чораан. Тываның Баштыңы ол хемчеглер үезинде комплекс буддийжи үзел-бодалдың төвү апаар ужурлуг деп демдеглээн. Аңаа эртем сессиялары, дискуссия шөлдери, культурлуг хемчеглер болуп эртер. Комплекстиң техниктиг чепсеглээшкининче онза кичээнгейни угландырар: агаарладыр, үн болгаш чырык дериг-херекселдерин эде чаартыр. Спорт комплекизин тыва культураның ылгавыр демдектери-биле буддийжи хевирге каастаар.
Россиядан болгаш делегейниң өске-даа чурттардан чүс-чүс аалчыларны уткуп алырынга белеткенип тура, оларга таарымчалыг чурттаар байдалдарны хандырары чугула дээрзин Владислав Ховалыг бодунуң телеграм каналында айыткан. Ынчангаш хоорайда чүгле аалчылар бажыңнарын эвес, а хостелдер болгаш ниитиниң чуртталга бажыңнарын хаара тудуп, өрээлдер фондузун санаары чугула. Кол негелде – ачы-дузаның шынары бедик болгаш арыг-силиг болур ужурлуг. Кызылда президентиниң кадет училищези база немелде чурттаар чер апаары чугаажок.
Кызылдың чаагайжыдылгазы – шуулганга белеткелдиң чугула кезээнге хамааржыр. Хоорайның кудумчуларын экижидип, бажыңнар даштын чаартыры "орук картазында" кирген.
Владислав Ховалыг Дээди Хуралга Айыткалында республиканың чурттакчыларын, организацияларны, бүдүрүлгелерни каттыштырып мөөңнээн «Тыва: чаа овур-хевир, чаа делгемнер» деп төлевилелди эгелээрин саналдаанын сагындыраал. Төлевилел шуулганга белеткелден аңгыда, республиканың комплекстиг чаагайжыдылгазын чада аайы-биле боттандырарынче, чуртталга кварталдарын болгаш хөй-ниити девискээрлерин чаартырынче угланган.
