Бөгүн, июль 26-да, Тываның Баштыңы Владислав Ховалыг Бии-Хем кожууннуң Өөк сумузунуң тудуг объектилерин хынап четкен.
Бир дугаарында көдээ культура бажыңының капитал септелгезин хынап көрген. Капиптал септелгени Хачатур Буликярның тудуг организациязы хүлээнип алган. Бригадада 12 тудугжу ажылдап турар. Септелге ажылдары бо чылдың апрель айда эгелээн. Ажыглалче октябрь эгезинде киирерин планнап турар.
Культура оран-савазын 1967 чылда туткан. Амгы үеде тудуг ажылдары 75 хуу күүсеттингенин Өөктүң көдээ культура бажыңының директору Шораана Монгуш чугаалаан.
Культура бажыңның чаа котельнаязынга дериг-херексел садарда, 1 сая 700 акша херек. Ынчангаш Тываның Баштыңы культура болгаш тудуг сайыттарынга ук айтырыгны дарый шиитпирлээр даалгаларны берген. Тудугларны үе-шаанда, эки шынарлыг кылырын ол негээн.
Объектиниң үндезин септелгезин «Культура» национал төлевилелдиң чорудуу-биле кылып турар. Тус черниң чурттакчылары ийи каът, улуг соңгаларлыг, чаартынган оран-савалыг болурунга өөрүп турар.
Ол ышкаш Тываның Баштыңы Өөк сумузунда ангар хевирниң спорт залының тудуун база хынап көрген.