Тываның Баштыңы Владислав Ховалыг Бии-Хем кожуунче ажылчын сургакчылаашкын үезинде, 2024 чылда «Культура» национал төлевилели-биле кылдынган Өөк суурда культура бажыңының үндезин септелгезиниң түңнелдерин хынапкөрген. Ол ышкаш «Күш-культура болгаш массалыг спортту хөгжүдери» федералдыг программа езугаар туттунуп турар ангар хевирниң спорт залының тудуунга база четкен.
«Культура» нацтөлевилелге киржилге чүгле тудугнуң бодун эвес, а культура объектизиниң инфратургузуун чаарткан. Фойени, көрүкчүлер залын, кабинеттерни, ном саңын чаартып, шупту соңгаларны, эжиктерни, электри четкизин, чылыг системазын солуп, дээвиирин бүрүнү-биле септеп, даштын чаартып, культура бажыңының котельнаязын база септээн.
Владислав Ховалыг клубтуң септелгезин бодунуң хыналдазынга ап, эрткен чылдың августан бээр чаңгыс эвес удаа аңаа четкен. Тываның Баштыңы ажылдың түңнелдерин таныжып көргеш, бүрүн чаартынган культура бажыңы суур чонун хаара тудар сорунза апаарын бодунуң блогунда демдеглээн: «Суурнуң чурттакчыларының чогаадыкчы болгаш бүгү талалыг хөгжүлдезинге амгы үениң шөлү ажыттынарынга өөрүп тур мен» – деп, ол бижээн.
Культура бажыңының чаартылгазы тус черниң чурттакчыларынга болгаш культура болгаш уран чүүлге ынак бүгү-ле кижилерге онзагай болуушкун болган. Албан черинге билдингир коллективтер ойнап, ургулар бөлгүмнери болгаш чогаадыкчы студиялар ажылдап, 150 кижини доктаамал долдуруп турар көрүкчү залдыг амгы үениң дыштанылга төвү апарган.
Владислав Ховалыг ангар хевирниң спорт шөлүнүң тудуунга база четкен. «Күш-культура болгаш массалыг спортту хөгжүдери» деп федералдыг программа езугаар төлевилел боттанып турар.
ТР-ниң Спорт яамызының удуртулгазы-биле боттуң тудугжуларын ажыглап тургаш, спортчу объектини тудуп турар. Тудуг эгелээнден бээр кожууннуң шупту спортчу албан черлеринден болгаш ажылчын коллективтерден эр улус бригадалары ында хаара туттунган. Суурнуң херээжен чону тудугжуларны изиг чем-биле чемгерип турар. Тываның Спорт яамызы бо арга чарыгдалдарны эвээжедиринден аңгыда, албан черлериниң ажылдакчылары ажылының онзагайын билир болганындан, тудугну дүргедедиринге бүзүрелдиг.
Өөктүң аныяк чурттакчыларынга объект командалыг болгаш чаңгыстың спортчу хевиринге халас киржир арганы бээр деп Владислав Ховалыг демдеглеп, регион чазааның кол угланыышкыннарының бирээзи – республиканың кожууннарында культура болгаш спортка амгы үениң байдалдарын тургузары болур дээрзин демдеглээн.
