Тываның Баштыңы Владислав Ховалыг чаа томуйлаттынган Кыдат Улус Республиканың Иркутск хоорайда чиңгине консулу Лю Юй-биле ажылчын ужуражылганы эрттирген. Аңаа кады ажылдажылганың бот-боттарынга ажыктыг аргаларын сайгарып көрген.
Владислав Ховалыг Лю Юйга томуйлаттырганы-биле байырын чедирип, ийи улуг күрүнениң кожа-хелбээ эп-найыралдыг кады чорууру болгаш бот-боттарынга ажык-чарлыг удур-дедир харылзаазы Россия биле Кыдаттың аразында эчис сорулгалыг кады ажылдажылгада бүзүрелдиң үлегер-чижээ апарганын демдеглээн.
Консулдуң шынзылгазын дамчыдар езулал соонда, ийи тала кады ажылдажылганы хөгжүдериниң дугайында бодалдарын солушкан.
Тываның Баштыңы Енисей Сибириниң кожа-хелбээ регионнарының экономиктиг хөгжүлдезинге база логистика хандырылгазынга улуг идигни бээр республиканың идип үндүргени делегей чергелиг кол төлевилелдериниң дугайында чиңгине консулга таныштырган. Ылаңгыя, Сибирь регионнарын Кыдат-биле Моол таварты харылзаштырар кызыгаар аразының чаа коридорунда чугула адыр апаар Хандагайты (Боршоо) эрттирилге пунктузунда чоруп турар эде чаартылга ажылдарын Владислав Ховалыг чугаалаан.
Президент Владимир Путинниң бо чылдың эгезинде атты салганы «Өөредилге адырында российжи-кыдат кады ажылдажылга чылдарын эрттирериниң дугайында» айтыышкыны езугаар Тываның күрүне университеди биле Кыдаттың башкарыкчы дээди өөредилге черлериниң аразында солчулга программаларын организастаарын Владислав Ховалыг чиңгине консулга саналдаан. Дээрги Лю Юй бо эгелээшкинни деткиирин аазаан.
«Дээрги Лю Юй ийи таланың харылзаазын быжыглаарынга деткимчени көргүзер дээрзинге идегээр бис. Бистиң кады ажылдажылгавыс үре-түңнелдиг болуп, республиканың чурттакчыларынга боттуг ажыкты эккээр дээрзинге бүзүрээр мен» – деп, Тываның Баштыңы МАХ-та бодунуң каналынга ужуражылганың түңнелдер тайылбырлаан.
