Тываның Баштыңы Маадыр ие Айнааш Ондарга үш өрээл квартираның сертификадын тывыскан

Тываның Баштыңы Владислав Ховалыг Россияда Иелер хүнүнүң бүдүүзүнде хөй ажы-төлдүг ие Айнааш Ондар-биле база ооң уруглары-биле ужурашкан.

Бо чылын Айнааш Ондар биле Олимпий Монгуштуң өг-бүлези Бүгү-россия чергелиг «2025 чылдың өг-бүлези» мөөрейге «Хөй ажы-төлдүг өг-бүле» деп бөлүкке тиилээн.

Хөй ажы-төлдүг өг-бүле сес кысты, дөрт оолду азырап өстүрүп чоруурлар. Россияның Президентизи Владимир Путинниң 2024 чылда шиитпири-биле Айнааш Ондар «Россия Федерациязының Маадыр иези» деп хүндүлүг атка төлептиг болган. Ажы-төл кижизидилгезинге ачы-хавыяазы бо хүндүлүг шаңналды алган республикада чаңгыс чаңгыс ие бо.

Владислав Ховалыг байыралдың хүнүнде өг-бүлениң чурттаар байдалын экижидеринге чугула базым болур үш өрээл квартираның сертификадын Маадыр иеге тывыскан.

«Өг-бүлениң ажы-төлү чугаакыр болгаш шыңгыы. Оолдарының бирээзи бокска, хүрешке сундулуг, Тываның ат-сураглыг спортчулары-биле кады белеткенип турарынга дузаны кадарынга белен бис» – деп, Владислав Ховалыг демдеглээн.

Тываның Баштыңы өг-бүлениң эр ээзи улуг оглу-биле кады тускай шериг операциязының киржикчилери дээрзин дыңнаткан. Бо өг-бүле маадырлыг чоруктуң, ынакшылдың, күш-ажылга ынакшылдың көскү үлегер-чижээ дээрзин ужуражылга үезинде демдеглээн.

Ужуражылга үезинде регионалдыг болгаш федералдыг деңнелде хөй ажы-төлдүг өг-бүлелерни деткиир хемчеглер болгаш программаларны чугаалашкан.