Тываның Баштыңы муниципалитеттер удуртукчулары-биле ужуражылгада кылыр ажылдың кол угланыышкыннарын айыткан

Тываның Чазаанга Владислав Ховалыгның кожууннар болгаш хоорайлар баштыңнары, чагырга даргалары-биле ужуражылгазында кыштың чугула айтырыглары – регионнуң чуртталга-коммунал ажыл-агый база энергетика адырының байдалын, мал кыштаглаашкынын чугаалашкан.

– Бөгүнде кол айтырыгларның бирээзи – кыштаглаашкынны эки эрттерин хандырары. Ажыл-агыйларда чеже мал чеми барын хынап, малчын турлагларже орук тырттар техниканы аңгылап, кандыг-даа байдалга белен турары чугула. Чер-черлерде удуртукчулар ол ажыл-херектерже кирерин муниципалдыг иштежилер-биле ужуражылгада чугааладым. Шак мындыг сооктар үезинде чылыдылга-одалга комплекизинде база чуртталга-коммунал ажыл-агыйында байдалды доктаамал хайгааралга тудар – деп, Тываның Баштыңы Владислав Ховалыг ужуражылга соонда социал четкилерде арынында бижээн.

Чагырга даргалары Тываның Баштыңынга муниципалдыг дилеглерин киирген – школаларның, уруглар садтарының, фельдшер-акушер пунктуларының, оруктарның социал инфраструктуразын чаартыры бирги чергениң айтырыы дээрзин демдеглээн. Чамдык муниципалитеттер «Сорунза» төлевилели-биле клуб тудар айтырыгны шиитпирлеп алырынга идегелин чугаалаан.

Владислав Ховалыг сөөлгү чылдарда национал төлевилелдер болгаш федералдыг программалар күүселдези-биле көскү өскерлиишкиннер болганын дыңнаткан. Беш чыл дургузунда республикага «Таарымчалыг хоорай хүрээлелин хевирлээри» төлевилел боттандырылгазы-биле Тывада 145 хөй-ниити девискээрин чаагайжыткан.

– Кожуун удуртукчуларының дыңнаткан айтырыгларын сайгарып көөр даалганы сайыттар кабинединге бердим. Оларның чамдыызы социал инфраструктура септелгезинге хамааржыр. Акша-хөреңгини тывар апаар бис.

«Таарымчалыг хоорай хүрээлелин хевирлээри» төлевилелге идепкейлиг киржиринче иштежилерни кыйгырдым. Владимир Владимирович Путинниң эгелээшкини-биле төлевилелди 2030 чылга чедир узаткан. Чонга эки чүүлдерни кылып аптар эптиг арга ол – деп, Тываның Баштыңы демдеглээн.

Бистиң республиканың хөгжүлдезинге стратегтиг ужур-дузалыг, хөй чылдарда санаан төлевилелдерниң боттанылгазы бо чылын кожууннарга эгелээрин Тываның Баштыңы сагындырган. Чижээ, Эрзин кожуунда литий чыдынын болбаазырадыры, «Хандагайты – Боршоо» хөй талалыг автомобиль эрттирилге пунктузун ажыдар бертинде «Ак-Довурак – Абаза» автооруун таптыг кылыры дээш, өске-даа төлевилелдерни чугаалаан.
Хөй талалыг автомобиль эрттирилге пунктузун ажыдыптарга, Россиядан Кыдатче база дедир талаже чүък сөөртүлгезиниң оруу каш катап кызырлы бээринге Сибирьниң өске регионнарының төлээлери идегеп турар.

Тываның Баштыңы ужуралга үезинде көдүрүлген айтырыгларны, чижээ, оруктарны хардан аштап, соок үелерде ЧКА шугумнарынга бо-ла болу бээр үрелиишкиннерни үе шаанда илередип, ону шиитпирлээриниң аргаларын чон-биле ужуралгаларда база чугаалажырынче чагырга даргаларын кыйгырган.