Тываның Баштыңы Владислав Ховалыг сарыг шажынныңделегей чергелиг III шуулганының үезинде, Россия Федерациязының Чазак Даргазының оралакчызы Дмитрий Чернышенко-биле ажылчын байдалда ужурашкан. Ужуражылга үезинде оралакчы дарга Тывада эртем, өөредилге, аныяктар политиказы, туризм, спорттуң хөгжүлдезиниң дугайында Владислав Ховалыг-биле чугаалашкан.
«Бистиң Президентивис Владимир Владимирович Путинниң онзалап демдеглеп турары-биле алырга, Тываның арга-шинээ аажок улуг, ону чедимчелиг ажыглаары чугула. Мында тускай мергежилдиглерниң өөредилгези болгаш белеткели кол черни ээлеп турар» – деп, Дмитрий Чернышенко демдеглээн.
Чазак Дарганың оралакчызы бурунгаар хөгжүлдеде республиканың чедиишкиннерин, школаларга болгаш уруглар садтарынга 11 муң хире чаа олуттуң ажыттынганын база чаарттынып септеттинген 48 школаны чижек кылдыр айыткан. Тывада өөредилге инфратургузуунуң тудуу уламчылавышаан: «Өзүлдениң демдээ»-биле 144 өөредилге төвү, уругларга «IT-куб» сан-чурагайлыг өөредилге төвү база «Кванториум» технопарктарның ажыттынган, республиканың хереглели-биле инженер-техниктиг, педагогиктиг мергежилдерге студентилерни белеткеп турар.
«Профессионалитет» федералдыг төлевилел чорудуу-биле регионга мурнады көөр угланыышкыннар: тудуг, даг-болбаазырадылга, көдээ ажыл-агый талазы-биле үш кластер тургустунган.
Ужуражылгага спорт айтырыгларынче онза кичээнгейни салган.
«Дмитрий Николаевич бо угланыышкыннарда ажылывыстың үре-түңнелдерин демдеглээн. Ылаңгыя, республика спортта эки көргүзүглерлиг: 2024 чылдың төнчүзүнге чедир спортче доктаамал хаара туттунган хамаатыларның деңнели 58 хуу, а спортчу оран-сава-биле хандырылга 82 хуу четкен. Федералдыг чазактың бистиң регионнуң хөгжүлдезинге деткимчезин улуг өөрүп четтириишкин-биле демдеглексеп тур мен. Республиканың күчү-күжүн долузу-биле ажыглаар дээш бүгү күжениишкиннерни салып турар бис» – деп, ужуражылга соонда Владислав Ховалыг социал четкилерде бодунуң блогунда бижээн.
Дмитрий Чернышенко Россияның Президентизи Владимир Путинниң Тываның туризм адырын регионнуң байлак, солун, онзагай бойдус хүрээлеңи-биле холбаалыг эң-не перспективтиг адырның бирээзи деп үнелээн. Ол ышкаш «Туризм болгаш аалчылар хүлээп алыышкыны» национал төлевилелге республиканың идепкейлиг киржилгези-биле солун турисчи программаларны сүмелеп, амгы үениң инфратургузуун тургузуп, аян-чорукчу агымнарны хандырары регионнуң кол сорулгаларының бирээзи деп санаан.
Тываның Баштыңы Россияның Чазааның бүгү талалыг деткимчези болгаш идепкейлиг кады ажылдажылгазы-биле айыттынган сорулгаларны чүгле чедип алыр эвес, а республиканың хөгжүлдезин чаа деңнелче көдүре бээринге бүзүрелин илереткен.