Тываның Баштыңы Владислав Ховалыг Москвага ажыл-агыйжы сургакчылаашкын үезинде, Федералдыг Хуралдың үстүкү палатазының спикери Валентина Матвиенконуң удуртулгазы-биле эрткен, 2026 чылда база планныг 2027- 2028 чылдарда федералдыг бюджет төлевилелиниң кезектерин сайгарган парламент дыңнаашкыннарынга киришкен.
РФ-тиң саң-хөө сайыды Антон Силуанов, РФ-тиң Саналга палатазының даргазы Борис Ковальчук, РФ-тиң Төп банкызының даргазының оралакчызы Алексей Заботкин дыңнаашкыннарга киришкен. Чурттуң кол саң-хөө документизин сайгарарынче федералдыг болгаш регионалдыг деңнелдиң күрүне эрге-чагыргазының хоойлужудулга болгаш күүсекчи органнарының удуртукчулары, эртем болгаш эксперт ниитилежилгелериниң кежигүннерин чалаан.
РФ-тиң саң-хөө сайыды Антон Силуанов федералдыг бюджеттиң кол параметрлери болгаш мурнады боттандырар угланыышкыннары хамаатыларның мурнунга социал хүлээлгелерни күүседири, камгалал болгаш айыыл чок чоруктуң хереглелдерин хандырары, Президентиниң айытканы чуртту хөгжүдериниң национал сорулгаларын чедип алыры деп демдеглээн.
Владислав Ховалыг бодунуң блогунда хуралдың түңнелдерин тайылбырлап тура, чурттуң кол саң-хөө документизиниң мурнады шиитпирлээр айтырыгларынга демографияны экижидер, камгалал комплекизин быжыглаар, тускай шериг операцияларының киржикчилерин деткиир хемчеглерни акшаландырары болуп артканын дыңнаткан. «Үш чылда «уруглар бюджеди» 10 триллион рубльден ажа бээрин Валентина Ивановна демдегледи. Ол акша-хөреңгини хереглелдиг өг-бүлелерге көрдүнген уруглар пособиелерин төлээринче, ие капиталының программаларын уламчылаарынче, ажы-төлдүг өг-бүлелерниң чурттаар оран-савазын экижидеринче дээш, оон-даа өске угланыышкыннарже ажыглаар» – деп, Тываның Баштыңы бижээн.
Экономика субъектилериниң шынар чок үндүрүг болгаш каайлы чиигелделерин кызырар, чарыгдалдарны эвээжедир, субсидиялар бээрде тодаргай ажылды хандырар, үндүрүг ставкаларын көвүдедир айтырыгларны сенаторлар хурал үезинде көдүрген. Ол ышкаш ажыл чок чурттакчы чоннуң медицина камгаладылгазының төлевири-биле холбашкан айтырыгларны шиитпирлээрин, чамдык регионнарда тарифтерни эмин эртир өстүргенин болгаш өске-даа хөй айтырыгларны сайгарып көрген.
Дыңнаашкынның түңнелдери-биле Федерация Чөвүлелиниң сенаторларының киирген санал-оналдарын 2026-2028 чылдарда федералдыг бюджет төлевилелиниң бирги номчулгазынга ажыглаар кылдыр РФ-тиң Саң-хөө яамызынче киирер.
Федералдыг бюджеттиң түңнел редакциязынга даянып, регионалдыг бюджеттер хевирлеттинерин Владислав Ховалыг демдеглээн. Тыва Республиканың Саң-хөө яамызында кол саң-хөө документизиниң ажылы төнчү чадазында келген.
Эрткен чылдарда ышкаш, бюджеттиң социал угланыышкынныг адыры – кадык камгалалын, өөредилгени, ажы-төлдүг өг-бүлелерни болгаш тускай шериг операцияларының киржикчилерин деткиир хүлээлгелерни акшаландырары – Тыва Республика бюджединиң дараазында үш чылда мурнады боттандырар ажылы болуп артар.
