Тываның Баштыңы Владислав Ховалыг ажыл-агый аайы-биле Москвага Росавиацияның удуртукчузунуң оралакчылары Наталья Андрианова, Алексей Буевич-биле ужурашкан.
Авиарейстерге субсидия бээр программага Тыва Республиканың киржилгезин, ол ышкаш «Кызыл» аэропортунуң аэровокзал комлекизин IV делегей чергелиг буддийжи шуулган бүдүүзүнде чаартырының айтырыгларын сайгарып көргеннер.
«2026 чылда «КрасАвиа» биле «Сибирь» авиакомпаниялар (S7) Кызыл биле Красноярск, Улан-Удэ, Новосибирск хоорайлар аразынга рейстерни уламчылаар. «Сибирь» (S7) база «ИрАэро» авиакомпаниялар «Кызыл – Москва» аразында маршрутка үш муң ажыг пассажирлерни аргыштырганы дээш субсидияны алыр» – деп, Владислав Ховалыг ужуражылга соонда бодунуң телеграм каналынга дыңнаткан.
Федералдыг бюджеттен тускай угланыышкынныг программалардан иштики рейстерге субсидия акшазын берип турар. Айыттынган рейстер 486 ужудуушкунну кылып, 26 муң ажыг пассажирни аргыштырар кылдыр 71,8 сая рубль акша-хөреңгини тускайлаан.
«Кызыл – Москва» рейс-биле 3100 пассажирниң аргыштырылгазынче 25,2 сая рубльди аңгылаан. Тываның Чазаа авиарейстерге субсидиялар бээриниң аргаларын авиакомпаниялар-биле кады ажылдап кылырын уламчылаар.
«Тываның чурттакчыларынга кожа-хелбээ регионнарже-даа, чурттуң төвүнче-даа дүрген болгаш эптиг чедеринге чедингир агаар транспорт херек. Сөөлгү каш чылдарда пассажирлер аргыжылгазы доктаамал өскени демдеглеттинген – 2022 чылда 91,2 муң кижи турган болза, 2055 чылдың төнчүзүнге чедир 147,7 муң четкен. Чурттар аразынга угланыышкыннар, чижээ, Моолче рейс хереглелде дээрзин көрдүвүс. Тываның Баштыңы болгаш чазаа-биле кады авиа аргыжылганы оон-даа хөгжүдеринге чугула хемчеглерни ажылдап кылыр бис» – деп, Наталья Андрианова демдеглээн.
Владислав Ховалыг Кызыл – Томск аразынга авиааргыжылга ажыдарының дугайында айтырыгны чугаа үезинде база көдүрген. Республиканың удуртукчузу Томск хоорайда өөренип турар дыка хөй тыва студентилерге база медицина төптеринче эмненип чоруп турар чонга ол рейс дыка херек деп демдеглээн. Томск облазының удуртулгазы ийи регионнуң аразынга дорт рейсти субсидиялаар талазы-биле Тываның Чазааның планнарын деткип турар.
Федералдыг авиатранспорт агентилелиниң төлээлери ол айтырыгны деткииринге беленин чугаалааш, ол рейске ужудуп болур хире авиакомпанияны дилеп турарын дыңнаткан.
2026 чылдың август айда болур IV дугаар делегей чергелиг буддийжи шуулганның бүдүүзүнде аэровокзал комплекизиниң даштыкы болгаш иштики септелгезин кылыр айтырыгны ужуражылганың киржикчилери аңгы чугаалашкан. Владислав Ховалыг транспорт инфратургузуунуң объектилерин амгы үениң стандарттарынга дүүштүр ажылдап кылган дөзевилел төлевилелин январь төнчүзүнге чедир федералдыг агаар-транспорт агентилелинче киирерин дыңнаткан.
Тывада демир-орук аргыжылгазы чок болганы-биле, улуг ужур-уткалыг хемчегниң аалчыларынга болгаш киржикчилеринге аай-дедир чоруур кол арга чүгле авиатранспорт апаар дээрзинге ийи талалар чөпшээрешкен.
Росавиацияның удуртулгазы шуулганның бедик деңнелге эртерин чедип алыр дээш, Кызыл аэропортунга транспорт аргыжылгазын организастаары-биле холбашкан айтырыгны ханы сайгарып көөрүнге беленин чугаалаан.
Агаар транспортунуң инфратургузуун хөгжүдер фондунуң акша-хөреңгизи-биле 2026 чылдан 2030 чылга чедир «Кызыл» аэропортун септээри демдеглеттинген. Дүрген эптээр материалдардан модульдуг машина тургузар черлерни, улуг чүък, почта болгаш хол чүъгү аайлаар терминалды, диспетчер черин болгаш аварийлиг-камгалал станциязын тудары планнаттынган.
2026 чылда Тываның хамааты авиациязы 80 чыл оюн демдеглээр. 1946 чылда Тываның авиация бүдүрүлгези тургустунуп, Кызылдың аэропорту ажылдап эгелээн. Бо хүнде республиканың төвүнден Москва, Новосибирск, Красноярск, Иркутск, Улан-Удэ хоорайларже рейстер ужуп турар.
