Тываның Баштыңы Владислав Ховалыг Россияның Маадыры, генерал-полковник Андрей Мордвичев-биле ужурашкаш, бистиң республиканың шериг албан-хүлээлгелиглеринге чугула айтырыгларның болгаш тускай шериг операциязының киржикчилеринге дуза чедирериниң организастыг талаларын сайгарган.
Владислав Ховалыг хууда составты деткииринче угланган тодаргай хемчеглер дугайында чугаа болганын хууда блогунда дыңнаткан. Тываның Баштыңы ноябрь 1-де 55 дугаар аңгы гвардейжи мотоадыгжы бригаданың (дагжы) 10 чыл болганы юбилейиниң дугайында Россияның Чепсектиг Күштериниң чер кырының шериглериниң кол командылакчызынга чугаалаан.
"Он чыл дургузунда дайынчылар шыдамык, бедик профессионал чоруун, ажыл-херээнге бердингенин көргүскеннер. Андрей Николаевич бистиң дайынчыларывыстың бедик белеткелин болгаш дайынчы хей-аъдын моон-даа соңгаар кадагалап арттырары-биле төлептиг кичээнгей болгаш деткимче херек дээрзинге чөпшээрешти" – деп, Владислав Ховалыг бодунуң блогунда бижээн.
Тыва Республикага шериг кезээн тургузар дугайында РФ-тиң Чепсектиг Күштериниң Чиңгине штавының шиитпири-биле, 2015 чылдың ноябрь 1-де 55-ки гвардейжи мото-адыгжы (дагжы) бригада тургустунганын сагындыраал. Колдуунда-ла Тывадан шериг албанныг кижилер-биле тургустунган Төп шериг округунда онзагай шериг кезээ болур.
Россияның Камгалал яамызы 2023 чылдың февральда Тываның Баштыңы Владислав Ховалыгның билдириишкинин хүлээп ап, бригадага «гвардейжи» деп хүндүлүг атты тывыскан, ол чүүл Россияның Чепсектиг Күштериниң шериг кезектериниң аразында бөлүктүң үлегер-чижектиг деңнелин көргүзүп турар.