Тываның Баштыңы Владислав Ховалыг Москвага Россияның кадык камгалал сайыды Михаил Мурашко-биле ажыл-агыйжы байдалда ужурашкаш, республиканың кадык камгалал системазының хөгжүлдезин чугаалашкан.
Кадык камгалалының эгеки чадазын эде чаартыр регионалдыг программаның боттанылгазын, республиканың уруглар эмнелгезиниң тудуу кайы-хире чоруп турарын база туберкулезка удур болгаш онкология диспансерлерин тудар документиниң төлевилел-санаашкынын сайгарып көргеннер. Ол ышкаш федералдыг албан черлери-биле кады ажылдажылга негеттинип турар айтырыгларны чугаалашкан.
Кадык камгалалының эгеки чадазын эде чаартыр регионалдыг программа күүселдези-биле республикада эмнелге организацияларының материалдыг-техниктиг байдалын элээн экижидип, эвээш чурттакчылыг черлерде чаа объектилерни тудуп, медицина албан черлерин амгы үениң диагностика дериг-херекселдери-биле чепсеглээн. Бо чылдан эгелеп регионалдыг программа «Узун болгаш идепкейлиг назын» национал төлевилели-биле боттанып турар.
Тывага бо программа күүселдези-биле 2021 чылдан эгелеп кадык камгалалының 34 чаа тудуу дужааттынган, 16 объектиге үндезин септелгелерни чоруткан. Республиканың медицина организацияларында 39 санитар машиназын база 395 эмчи дериг-херекселин садып салган.
Бо чылын 12 объектиде тудуг ажылдары уламчылавышаан, кадык камгалалының беш тудуунда үндезин септелге чоруп турар. 48 автомобильди база 179 эмчи дериг-херекселин саткаш, кадык камгалал организацияларынче үлээн.
Владислав Ховалыг биле Михаил Мурашко ол угланыышкынга ажылдар уламчылаар дээрзин демдеглээннер. Дараазында уруглар болгаш туберкулезка удур эмнелгелериниң, ол ышкаш онкология диспансериниң чаа тудугларының чорудуун сайгарган. Туберкулезка удур диспансерни тударынче онза кичээнгейни салып турар, чүге дизе ону тударын Президент Владимир Путин дужааган.
ТР-ниң Кадык камгалал яамызының дыңнатканы-биле алырга, республикада туберкулезка удур байдал нарын хевээр. 2024 чылда чурттакчы чонга рентген шинчилелдерин көвүдеткенинден муниципалитеттерде аарыгның өзүлдези демдеглеттинген. Регион диагностика дериг-херекселдерин, ооң иштинде көжүп чоруур дериг-херекселдерни чаартырынче хөй акша-хөреңгини үндүрүп турар. 2022 чылдан бээр бо сорулгаларже барык 100 сая рубль үнген. Профилактиктиг шинчилелдерни көвүдеткенинден, сөөлгү беш чылда туберкулезтан өлүп-хораары эвээжээн, 2024 чылда ол көргүзүг ооң мурнунда үе-биле деңнээрге 16 хуу баткан.
Тываның Баштыңы регионалдыг Кадык камгалал яамызы чаа туберкулез эмнелгезин тударының төлевилел-дөзевилел документациязын доосканын дыңнаткан. Онкология диспансериниң чаа оран-савазының төлевилели база төнчү чадазында келген.
Уруглар эмнелгезиниң үш каът бажыңының тудуу «Кадык камгалалының инфратургузуун хөгжүдери» федералдыг төлевилел езугаар чоруп турар. Төлевилел езугаар чаа объектини 150 орунга санаан. Уруглар эмнелгези үш салбырлыг болур, оон аңгыда психиатрия, хирургия, анестезиология болгаш реанимация, интенсивтиг терапия салбырлары көрдүнген. Тудугнуң ниити шөлү – 15 муң дөрбелчин метр ажыг. Эмнелге комплекизи беш адырдан тургустунгар.
Владислав Ховалыг санитарлыг авиация албанының ажылын илеткеп тура, республиканың дыка хөй суурлары ыраккы, чедери берге черлерде болгаш, кижилерниң амы-тынын камгалаарынга санавиация дузазы кол черни ээлеп турарын демдеглээн. Бо чылын санитарлыг авиация бригадазы 83 ужудуушкунну кылып, 153 аарыг кижини камгалаан.
Тываның Баштыңы республиканың кадык камгалал системазын хөгжүдер талазы-биле ажылды федералдыг чазак-биле сырый кады ажылдажылгалыг уламчылаарын ужуражылганың түңнелинде бодунуң блогунда дыңнаткан.