Тываның Баштыңы Владислав Ховалыг Тывадан шеригже кыйгырткан солдат Кудерек Артынаның албан хүлээлгезин эрттирип тургаш мөчээниниң чылдагаанын тывар даалганы берген.
Владислав Ховалыг Тывадан шериг оолдуң чок болганының дугайында медээни алган дораан, Кудерек Артынаның өг-бүлезинге чогуур дузаны көргүзер база болган чүүлдү эки сайгарар айтыышкынны берген.
Регион Баштыңының даалгазы езугаар, Тываның Чазак Даргазының оралакчызының хүлээлгезин күүседип турар Айдыс Сынаа чок болган солдаттың авазының адындан РФ-тиң Чиңгине прокурорунуң оралакчызы – кол шериг прокурор Валерий Петровче онза болуушкунга хыналданы эрттирерин дилээн албан езузунуң негелдезин чоруткан.
Тывада кижиниң эргелериниң талазы-биле бүрүн эргелиг төлээ Александр Адыгбай халаптыг таварылганың чылдагааннарын тодарадыры-биле Брянск облазында онза болуушкун болган шериг кезээнче үнүпкен. Ооң-биле кады Москва хоорайда Тываның бүрүн эргелиг төлээ чериниң төлээлери обласче чорупканнар.
Кызыл кожууннуң Черби суурунуң чурттакчызы Кудерек Артына шериг алба-хүлээлгезин эрттирип тургаш чок болган дугайында медээ социал четкилерге болгаш мессенджерлерге январь 21-де тараан. 2024 чылдың майда ол шеригже аъттанган. А солдат оолдуң ада-иези январь 19-да ооң эштеринден ындыг медээни алганнар.
Тываның Баштыңы шеригже кыйгырткан оолдуң канчап мөчээнин тодарадырын дааскаан
6 февраля 2025
9